KAAPSTAD. – Die sosiale vlinder Paris Hilton het stil-stil haar verskyning by vanjaar se My Coke Fest in die Moederstad gemaak.

Hilton is aan die sy van haar kêrel, die sanger Benji Madden, wie se groep Good Charlotte gister op die musiekfees by die Kenilworth-renbaan opgetree het.

Sy en die groep het gistermiddag met grys BMW’s by Kenilworth opgedaag. Hilton het beskeie vir die kamera geglimlag.

Volgens ’n werknemer van Coca-Cola Suid-Afrika, een van die borge van die fees, was Hilton slegs hier om haar kêrel te ondersteun.

Sy het op gister se fees, sowel as Vrydag tydens die Johannesburgse deel van die toer, op die agtergrond gebly.

Die My Coke Fest, wat jaarliks deur Coca-Cola, Big Concerts en 5FM aangebied word, verskaf 12 uur van ononderbroke rockmusiek aan konsertgangers.

Prime Circle, Kaizer Chiefs, 30 Seconds to Mars en Korn is van die groot name in die plaaslike en internasionale rockbedryf wat die gehoor vermaak het.

Die voorsanger van die groep 30 Seconds to Mars, Jared Leto, het in hul vertoning die gehoor met sy hipnotiserende blik en sangtalent betower.

Dit is die derde jaar dat die konsert in Suid-Afrika aangebied word. ’n Werknemer van Coca-Cola Suid-Afrika het gesê die organiseerders se verwagtinge is oorskry as daar gekyk word na die kaartjieverkope vanjaar, wat drasties toegeneem het. Die span beoog om reeds vroeg met beplanning vir My Coke Fest 2009 te begin.