KAAPSTAD. – Die Afrikaanse sangeres Helenè Bester (32), van Johannesburg, was gistermiddag in ’n botsing in die middestad betrokke – ’n dag voordat sy vir die Twee Oseane-marathon sou aantree.

Bester was op pad terug na haar blyplek op Wellington nadat sy haar laat registreer het vir die marathon, wat vandag plaasvind. Die botsing het haar egter nie van stryk gebring nie, en sy was gistermiddag steeds vas van plan om deel te neem.

Die ongeluk het net ná 13:00 plaasgevind op die hoek van Oswald Pirow-straat en Hertzogboulevard.

“Ek wou regs draai, nadat die pyltjie groen gewys het, toe vind die botsing plaas,” het Bester gesê.

Haar motor, ’n metaalblou Ford Fiesta, het teen die motor van me. Lanette Olivier (53) gebots.

Volgens Olivier se seun, mnr. Tinus Olivier, is sy ma se toestand bevredigend. “Sy het net ’n bietjie harsingskudding en moes ’n paar steke aan haar kop kry,” het hy gesê.

Bester self het geen beserings opgedoen nie.

“Die ongeluk het my laat besef hoe nietig jou lewe is,” het sy geskok gesê.

Asof die sanger en drawwer nie genoeg hooi op haar vurk het nie, gaan sy volgende Woensdag op die Klein Karoo Nasionale Kunstefees optree.

Bester, van wie twee CD’s al verskyn het, het haar jongste CD, Oorgee, onlangs uitgereik.

Sy is ook in 2004 as die beste vroulike kunstenaar benoem vir die Geraas-musiektoekennings.