OUDTSHOORN. – Nié ’n toneelstuk of selfs ’n kordaatstuk in ’n biertent nie, maar ’n trompop-botsing tussen ’n leerling-troepedraer en ’n BMW het Woensdag die vroeë kollig by vanjaar se Absa KKNK gesteel.

Die botsing het omstreeks 15:00 in die kern van die dorp, op die hoek van Voortrekker- en Adderleystraat, plaasgevind te midde van ’n immer-groeiende toestroom van besoekers by vanjaar se fees, wat Vrydag begin.

Die tamaai weermagvoertuig, met reuse-leerdersbestuurder L’e op die tentbruin deure, het volgens mnr. Oswell Bruiners, van Bridgton, Oudtshoorn, bitter amper bo-oor sy motor gery. Hy was alleen in die motor nadat hy ’n passasier afgelaai het en op pad was om te gaan volmaak.

Die oopbak-voertuig se buffer het op Bruiners se paneelbord bo die stuurwiel tot stilstand gekom.

Bruiners is nie beseer nie, maar moes oor die voorste passasiersitplek klim om te ontsnap.

Die 56-jarige Bruiners, ’n motorbestuurder van beroep, was sigbaar geskok, maar het moedig ’n kort onderhoud toegestaan terwyl ’n skare nuuskieriges tot sowat 100 gegroei het terwyl die voertuie moeisaam uitmekaar gebeur is deur ’n opruimingspan.

Polisiebeamptes en weermagpersoneel op die toneel het teen saktyd geweier om kommentaar te lewer en het verdere navrae na die skakelkantoor van die militêre polisie verwys.

’n Omstander het die voertuig as ’n Samil 50 uitgeken.

“ ’n Mens dink daai tyd baie goedjies,” het Bruiners vertel met verwysing na die sowat 2 m wat die momentum sy BMW teruggestoot het oor die teerpad.

Volgens hom kon die bestuurder van die vragmotor nie die draai na links uit Voortrekkerstraat baasraak nie.

Sy motor was stilstaande toe die Goliat-teen-Dawid-impak plaasgevind het.