KAAPSTAD. – Met die hulp van ’n agterstewe uit die gehoor het ’n Britse smaakklierpionier gister ’n toebroodjie soos min hier berei.

Stefan Gates is ’n kosskrywer en bekroonde televisie-aanbieder van die BBC se Cooking in the Danger Zone-reeks. Hy het sy sogenaamde “bum sandwich” voor ’n klein gehoor by ’n multimedia-kombuis onder die vaandel van vandeesweek se Good Food and Wine Show by die Kaapstadse Internasionale Konferensiesentrum (Kiks) aanmekaar geslaan. Die klein kaas-en-pesto-toe(sit)broodjie is met plastiek toegedraai en toe aan ’n jong vrywilliger in die gehoor oorhandig om dit behóórlik pap en warm te sit.

Volgens Gates is dié ’n ou Britse resep vir ’n aweregse, maar tog lekker versnapering. Ná sowat 40 minute is die jong man gevra om op te staan en die gereg is in repies gesny en op ’n aantal grootskerms bo die praalkombuis vertoon.

Gates het ook ’n paar ander ongewone geregte voorgesit – dít nadat hy vroeër dié week op eie stoom Guguletu binnegevaar het om ’n plaaslike township-gunsteling te nuttig.

Hoewel dié gereg in volksmond ’n “smiley” heet, is die lekkerste deel van ’n gekookte en gebraaide skaapkop glo inderwaarheid die (retina-lose) oë – nie die grynslag nie, sê Gates.

Volgens hom was dié gereg wat hy beleef het, ’n welkome afwisseling van stedelike Kaapstad se gul soesji-aanbod.

Die kosskou duur tot 18 Mei.