Bloemfontein. - Met die motor-koek in Suid-Afrika wat maandeliks krimp, doen vervaardigers baie dinge om voornemende kopers se aandag te trek.

Renault het in dié omstandighede pas besluit om sy Expression-modelle voortaan as die Extreme te laat voortleef, met die uitsondering van die Expression 1.5 dCi.

Die Extreme-modelle is terselfdertyd sommer ook opgeknap en beskik oor nuwe toerusting en ’n paar kosmetiese veranderings.

Volgens Renault Suid-Afrika sal die Extreme-modelle ook ’n vars bries wees vir die sukses van sy va-va-voom-modelle (wat eintlik maar die intreevlak-buksies is). Onthou nou, va-va-voom is Renault se naam, en zoem-zoem Mazda s’n. Jip, ’n bemarker het dit uitgedink . . .

Terug by die opgekikkerde Clio’s. Hoewel die reeks grootliks onveranderd gebly het sedert die klein Fransman in 2006 hierheen gekom het, het Renault dit tog goedgedink om sy hare weer ’n slag te kam.

Al die Extreme-modelle sal voortaan, buiten die standaardtoerusting van die Expression, ’n leerbedekte ratknop en stuurwiel hê, asook ’n CD-speler, misligte voor, verhitte kantspieëls en getinte vensters.

Aan die binnekant het die middelkonsole nou ’n blou agtergrond terwyl chroom-afwerking rondom die deurhandvatsels ingespan word.

Die driedeur-modelle kry ook 15 duim-vellings en hoofligte wat die rigting van die stuur volg wanneer jy skerp draai. Vir die eerste keer is daar ook ’n 1.6 liter-enjin in die driedeurbakwerk beskikbaar.

Die nuwe Extreme-modelle se pryse is:

1.4 Extreme (vyfdeur) – R144 000; 1.6 Extreme (vyfdeur) – R155 000; 1.6 Extreme (vyfdeur, outomaties) – R165 500; 1.4 Extreme (driedeur) – R147 000; en die 1.6 Extreme (driedeur) – R158 000.