DIE Bien Donné-ekspo van die LNR Infruitec-Nietvoorbij het ’n nuwe organiseerder.

Cadek Media van Somerset-Wes is pas aangestel om vanjaar se ekspo te organiseer en te bestuur.

Die ekspo word op 6, 7 en 8 November op die Bien Donné-proefplaas by Simondium gehou.

Cadek Media is ’n bekende gesig by die ekspo, aangesien hy ook die geleentheid in 2002, ’03 en ’04 gereël het.

Met die ekspo wat vanjaar die 66ste keer gehou word, sal die fokus steeds op boerdery en landbouprodukte wees.

Die ekspo is oop vir alle landbousektore en -gewasse. Meer as 200 ondernemings sal hul produkte en dienste vertoon, wat dié geleentheid een van die grootste landbou-ekspo’s in die Wes-Kaap maak.

Volgens Cadek Media kan sowel uitstallers as besoekers ’n verskeidenheid nuwighede en verbeterings verwag. Die nuwighede sluit in ’n konferensie oor die sakeaspekte van wyn, asook ’n wynproduksie-emporium.

Volgens die organiseerders kan die bespreking vir stalletjies reeds gedoen word. Uitstallers moet so gou moontlik stalletjies bespreek om die beste posisie te verseker.

Navrae kan gerig word aan Cadek Media by tel. 086 122 2335, of anders kan sy webwerf by www.­cadek.co.za besoek word.