“NOG nooit voorheen het iemand vir my die Suid-Afrikaanse vlag gegee om mee oor die eindstreep te hardloop nie. Dit was die ongelooflikste gevoel.”

Só praat Dan Hugo, die nuut gekroonde Suid-Afrikaanse Duesouth Xterra-kampioen, op sy webtuiste, www.dghugo.com.

Hugo en Eszter Erdelyi van Hongarye is onderskeidelik die nuwe Suid-Afrikaanse mans- en vrouekampioen ná Saterdag se Duesouth Xterra-byeenkoms op Grabouw.

Die deelnemers moes 1,5 km swem, daarna 25 km op hul bergfietse jaag en 10 km op ’n veldlooproete hardloop.

Die 2007-’08-seisoen het die afgelope naweek met die belangrikste byeenkoms van almal geëindig.

Dit is nie net Hugo se vertoning en die beeld van dié 22-jarige Stellenbosser met die nasionale vlag in sy hande in die pylvak wat ’n knop in die keel bring nie.

As trotse Suid-Afrikaner en Xterra-ondersteuner kan ’n mens nie anders nie as om emosioneel te voel oor dié byeenkoms, wat een van die beste Xterra-byeenkomste in die ganse wêreld is.

En niemand is meer bevoeg om hieroor kommentaar te lewer as Suid-Afrika se driemalige wêreldkampioen Conrad (Caveman) Stoltz nie.

Volgens Stoltz kan hy met opregte trots by enige plek in die buiteland na die byeenkoms op Grabouw verwys.

Dit is nie net Stoltz wat sy waardering vir dié besonderse byeenkoms en die organiseerders daarvan uitgespreek het nie.

Die Hongaar Erdelyi, wat tans ook die Europese kampioen is, het gesê: “Die eerste en laaste deel van die 10 km-draf was regtig moeilik. Jy het geen idee hoe steil daai klim is nie!

“Dit het gevoel asof ek vir ewig klim, maar dit is besonders mooi.

“Die hele byeenkoms was perfek. Ek is so trots op my titel.”

Die Duitser Felix Schumann, wat tweede was, was sprakeloos. Dit was nie net die atmosfeer wat die 25-jarige mediese student beïndruk het nie, maar ook die ongelooflike mooi omgewing en organisering van die byeenkoms.

Nie eens swaar reën en bewolkte toestande kon die geesdrif van die deelnemers of die ondersteuners demp nie. Inderwaarheid het die reën tot ’n meer uitdagende byeenkoms bygedra.

Die reën het wel opgehou en die son het geskyn vir die twee uur wat Hugo nodig gehad het om ’n nuwe hoofstuk in sy loopbaan te skryf.

Op die bergfietsroete, wat lekker modderig was ná al die reën, was daar nie té veel tegniese uitdagings nie, maar wel ’n enkelroete wat die uitdaging wat nodig was, gebied het en baie bome wat vermy moes word!

Die drafroete het hier en daar die gevoel van seesand gehad en vir ’n groter uitdaging kon die deelnemers nie gevra het nie.

Wel . . . daar was een deelnemer wat ’n groter uitdaging gesoek het: Mandy Nel.

Nel het nie net daarin belanggestel om die Xterra-byeenkoms te voltooi nie. Sy het so ’n ietsie ekstra tot haar dag bygevoeg deur voor die tyd ook die Xterra Lite (400 m-swem, 12 km-bergfietsry en 5 km-draf) te doen.

G’n wonder nie dat Nel later die aand op die Aand van Kampioene as Duesouth Xterra se kryger(vrou) van die jaar aangewys is. Dit is deelnemers soos Nel, vir wie die uitslag van tweede belang of selfs geen is nie, wat die ware Xterra-krygers is . . . sonder om enigiets weg te neem van dié atlete vir wie die uitslag wel belangrik is.

Jean-Paul van der Linde was die ander kryger van die aand.

Die “Caveman” en Michelle Lombardi is as onderskeidelik die Xterra-mans en -vroue- atleet van die jaar aangewys.

Die nuwe seisoen begin op 10 Julie met die Knysna-byeenkoms wat by Pezula gehou word.

Maar vir die volgende paar maande sal dit die beeld van ’n emosionele Hugo met sy landsvlag in die hand wees wat in die gedagtes bly.