Macstanley is reg om ­Europa te laat rock. Flat Stanley het dit in elk geval al in Suid-Afrika reg­gekry.

Die naamsverandering kom saam met die sukses wat gevolg het nadat ’n Duitse toeris Flat Stanley op ’n akoestiese konsert in die Green Dolphin in Kaapstad gesien het. Slegs 18 maande hierna het die lede van Flat ­Stanley ’n kontrak met iMusic Records geteken. Dit sluit onder meer in ’n bemarkingsveldtog van minstens €1 miljoen vir die album se bekendstelling.

Flat Stanley se Sama-benoemde tweede album, Between 2wo worlds, sal volgende jaar in Duitsland, Oostenryk en Switser­­­land uitgereik word. Twee bonussnitte van die eerste album, Of Secrets and Wine, sal daarby ingesluit word.

Andy Mac, Niel en Clinton ­vertrek einde vandeesmaand na Frankfurt om te gaan kennis maak met agente en om ­promosiemateriaal vir televisie en radio saam te stel. Die res van die orkes sal vroeg volgende jaar ook oorsee gaan vir optredes.

Volgens Andy is die naams­verandering nodig vir die internasionale mark aangesien die naam Flat Stanley oorspronklik dié van ’n kinderboekkarakter is en hulle aangeraai is om enige moontlike kopiereg-probleme te vermy. “In Suid-Afrika sal ons nog ­onder die naam Flat Stanley ­optree. Suid-Afrika bly ook ons basis. Soos die album se titel sê, sal ons tussen twee wêrelde wees.”

Oor die manier waarop hulle “ontdek” is, is hy ­filosofies.

“Of daar 10 of 10 000 mense in die gehoor is, ’n mens moet altyd jou beste gee. Daar bestaan vir ons nie so iets dat ons nie optree as die gehoor klein is nie. Jy kan net jou naam skade aandoen as jy vir ’n kleiner gehoor minder gee.”

Hy vertel dat hul eerste optrede in ’n plek met die naam The ­Veggie Table in Kalkbaai was.

“Daar was seker so 15 gesinne, maar ons het alles vir hulle ­gegee. Dit was die begin.”

Hy is nog effens oorbluf oor die internasionale kontrak.

“Dis mos elke orkes se droom. Daar is geen manier waarop ek kan beskryf hoe ons voel nie.”

Die eerste musiekvideo en ­enkelspeler wat in die Duitse mark bekend gestel sal word, is “As I Am”. Dis plaaslik amper hul kenwysie. Dit was nie net ­­bo-aan die gewildheidsleer op nasionale radiostasies nie, maar word ook deur M-Net gebruik in ­promosieveldtogte op televisie.

Flat Stanley het in die relatief kort tyd wat hy bestaan al saam met onder meer Metallica, Fat Boy Slim, Seether en Foreigner opgetree.

“Daar lê harde werk en baie ­opwindende tye vir ons voor,” sê Andy. “Ons sluit 2008 op die bes moontlike manier af.”