Hy is die wenner van die Men’s Health Look-kompetisie, maar Retha Grobbelaar het uitgevind Brendan Currin is baie meer as net ‘n mooi gesiggie.

Hy is dalk gemakliker in ’n kano as op ’n loopplank, maar dit het nie die 30-jarige Brendan Currin gekeer om vanjaar se Men’s Health Look-kompetisie te wen nie.

Dié aspirant-dokter van Emmarentia, Johannesburg, sê dit het steeds nie by hom ingesink nie.

“Ek kan omtrent niks onthou van die aand toe die wenner aangekondig is nie. Ek het dit glad nie verwag nie. Al nege deelnemers het ’n kans gehad om te wen. Ek het vandag na die video van die aand op die internet gekyk. Dis soos ’n droom.”

Volgens Currin wou hy nog altyd vir die kompetisie ingeskryf het.

“Ek het dit op TV en in die tydskrif gesien. Dis iets wat ek graag wou doen.”

As deel van die kompetisie het deelnemers op ’n avontuurnaweek in die Wes-Kaap gegaan.

Daar is hul senuwees behoorlik getoets.

Die manne moes onder meer abseil van Tafelberg, uit ’n helikopter in die see spring en van Leeukop af skermsweef.

Die sportmal Currin was in sy element.

Die geheim is balans

“Dis ’n baie spesiale kompetisie. Ons het meer in drie dae gedoen as wat baie mense in ’n leeftyd doen. Ek was skoon depressief toe ek terugkom in Johannesburg, want daar was niks om na uit te sien nie. Dis ’n kompetisie waarvoor elke man in Suid-Afrika moet inskryf.

“Ek het elke oomblik geniet, maar veral die aktiwiteite wat ons buite gedoen het.

“Ek hou van enige sport, maar die skerm-sweef was die beste. Jy ervaar tegelyk adrenalien en rustigheid. Ek wil graag leer hoe om dit beter te doen.”

Currin het onder meer R15 000, die geleentheid om op Men’s Health se voorblad te pryk en ’n bootreis gewen.

“Ek is self nog nie eens seker wat al die pryse is nie. My ouers het sommer al gesê hulle wil op die bootreis gaan!”

Volgens hom is ’n mooi lyf nie al wat tel in die kompetisie nie.

“Mense dink dit gaan net oor hoe jy lyk, maar dis beslis nie al wat belangrik is nie. Jy kan nie net ’n gym freak wees nie. Dit gaan oor balans. Natuurlik moet jy fiks en gesond wees, maar jy moet ook kan ontspan en ’n bier geniet.

“Die belangrikste is dat jy nie voorgee nie – jy moet dieselfde mens voor die kameras én (in jou omgang met) die ander deelnemers wees.”

’n Buitelug-mens

Hoewel persoonlikheid ’n groot rol in die kompetisie speel, is ’n gesonde voorkoms ’n vereiste.

En Currin straal dit uit.

“Ek was seker ses jaar gelede laas lid van ’n gym. Ek sal veel eerder op die Emmarentia-dam roei wanneer die son begin sak en die water blink as om in ’n gebou te oefen.

“Ek het in KwaZulu-Natal grootgeword en daar het ons nie PlayStation gespeel nie, maar met snorkels rotspoele verken.”

Currin het nie voor die kompetisie enige modelwerk gedoen nie en volgens hom is die loopplank intimiderend.

“Ek het nog nooit voor honderde mense model gespeel nie. Jy moet van voor af leer loop. Gelukkig het Dewald Nolte, een van die deelnemers wat ’n ervare model is, my gehelp.”

Volgens Currin beplan hy nie om heeltyds modelwerk te doen nie.

“As mense my nader, sal ek modelwerk doen. Ek wil egter my voete op die grond hou en nie dink ek is groter as wat ek is nie.

“Ek wil steeds ’n dokter word en gaan nie nou my rug op my studie keer nie.”

Currin is ’n vyfdejaar- mediese student aan die Universiteit van die Witwatersrand (Wits) en het ook ’n B.Sc.-graad aan die Universiteit van Kaapstad behaal.

“Die redes hoekom ek ’n dokter wil word, het al baie verander.

“Eers het ek dit begin studeer omdat ek nie heeldag in ’n kantoor wou sit nie. Ek geniet dit om mense te help.”