DIE Kaapse teater The Independent Armchair Theatre in Observatory het ná sowat agt jaar sy deur gesluit.

Die huidige eienaar, Gilad Hockman, het in ’n persverklaring gesê finansiële oorwegings het die sluiting genoop.

Hockman het die teater in Maart 2005 ­oorgekoop toe dit ook groot skuld gehad het en sou sluit, maar dit het intussen een van die voorste lokale in die Kaap geword waar musiek uitgevoer is.

“Maar drie jaar later neem die skuld en stresvlakke gevaarlike afmetings, en duur bouwerk is nodig om die teater klankdig te maak ten einde aan die munisipale ­regulasie oor geraasbesoedeling te ­voldoen,” sê Hockman in die verklaring.

Hy het besluit om die teater te verkoop, maar “dit het nie volgens plan verloop nie”.

Sonder geld vir die nodige bouwerk en om die huur te betaal, het Hockman besluit om eerder die teater te sluit.

Hockman sê die vele musikante wat in die Armchair opgetree het, het van dié teater een van die bestes in die stad gemaak.

“Dit het altyd oor die musiek gegaan.”