KAAPSTAD. – Hulle ken van koeie melk, is bakgat met beeste, maar begeer hul eie bokkies.

Nou kry hubare, maar radelose Suid-Afrikaanse boere wat met vrouvang sukkel, uiteindelik die kans om op TV ’n bietjie liefde te soek vir daardie eensame winteraande.

Inskrywings open vandag vir kykNET se nuwe realiteitsreeks Boer soek ’n Vrou wat die TV-kanaal doen in samewerking met Landbouweekblad, jare lank reeds die stoere tydskrifbastion van die “Hoekie vir Eensames’’ en “By die Opsitkers’’.

Die Burger het by ’n betroubare bron verneem dat Elma Postma, bekend vir haar rol as Dezi in 7de Laan en deesdae aanbieder van Ontbytsake op kykNET, die aanbieder sal wees van die reeks, wat deur FreemantleMedia SA vervaardig word.

Die reeks van 13 episodes sal in spitskyktyd in Augustus uitgesaai word. Die vervaardigers beplan ook ’n opvolg-reünie-episode later waarin kykers sal uitvind wie ware liefde gevind het.

Boere van oor die land heen kan hulle nou laat inskryf vir die TV-reeks wat ’n internasionale wegholsukses is in lande soos België, Noorweë, Nederland, Oostenryk, Australië, Amerika en Brittanje.

In Boer soek ’n Vrou word ’n klomp boere voorgestel aan ’n paar vroue uit die stad. Die plaasboere kry dan die kans om die koring van die kaf te skei en ’n liefdesmaat te kies nadat vroue wat in die boer en sy lewenswyse belang stel, ’n paar speelse plaastakies moet verrig soos hoendereiers uithaal, terwyl hulle uitvind of hulle kan aard tussen bale hooi en dalk so ’n bietjie beesmis.

Die vervaardigers is op soek na tien ongetroude boere van oor die land heen om in te skryf, waarna hul profiel op TV uitgesaai sal word. Die land se vroue sal dan die kans kry om aan die plaasmanne te skryf, waarna hul plaasbesoeke of film vasgelê sal word. Vroulike boere wat man soek kan ook inskryf.

Inskrywingsvorms – in die nuwe Landbouweekblad wat van vandag te koop is – moet die tydskrif teen 31 Mei bereik en gepos word na Boer soek ’n Vrou, Landbouweekblad, Posbus 1802, Kaapstad 8000. Aansoekers kan egter ook registreer by www.kyknet.co.za of by www.Landbou.com of 021 421 3797 skakel.