KAAPSTAD. – Die operadiva Mimi Coertse gaan die eerste Suid-Afrikaner word wat die gesogte Galina Vishnecskaya-sangkompetisie in Moskou beoordeel.

Coertse (75) is een van nege beoordelaars van oor die wêreld heen wat gevra is om dié internasionale kompetisie vir operasangers en -sangeresse van 21 tot 28 Mei in die Internasionale Operasentrum in Moskou te gaan beoordeel.

Coertse, wat self ’n roemryke internasionale loopbaan in die operawêreld agter die rug het en wat in veral Wene, Oostenryk, naam gemaak het, het gister gesê sy beskou die uitnodiging om as beoordelaar op te tree as een van die hoogtepunte in haar loopbaan.

“Ek het al in sangkompetisies in Spanje en Duitsland as beoordelaar opgetree, maar nog nie in só ’n ­belangrike kompetisie nie. Vishnecskaya was een van Rusland se belangrikste operasangeresse.

“Ons skop op 21 Mei af met die openingsaand, beoordeel daarna ’n week lank die deelnemers en op 28 Mei is die groot toekenningsaand.

“Vir my is dit boonop ’n geleentheid om Rusland te leer ken. Ek was al in Moskou, maar net vir een dag. Ná die kompetisie gaan ek een van my lewensdrome bewaarheid deur na Sint Petersburg te reis, waar ek ’n paar dae gaan deurbring. Daar is so baie wat ek daar wil gaan sien.”

Coertse keer in Junie na Suid-Afrika terug – betyds vir haar 76ste verjaardagviering op 12 Junie.