TONEEL: The Ugly Duckling and Other Stories. Aangebied deur die Lilliput Players. Gegrond op drie verhale van Hans Christian Andersen. Regisseur: Elton John Duffy. Met Duffy, Bronwyn Reddy, Nikki Louw en Carmen Maarman. Vir kinders twee jaar tot elf jaar. In die Baxter-teater, Rondebosch. Tot 12 April.

DIE teatergangers was besonder ordelik en het gereageer op die plekke waar vrae aan hul gestel is. Soms, waar ­iemand opgewonde een van die aktrises herken, is op Engels uitgeroep: “Dis weer daai ou vrou!”

Hoewel hulle uit die klaskamer was, was hulle beslis nie uit die klas nie.

Nietemin het die ontvouende lesse van die Lilliput Players se produksie The Ugly Duckling and Other Stories hulle meegevoer.

Die akteurs se liedjies het die meeste gehoorlede meegevoer, dermate dat vyf in die voorste ry lustig vir die regisseur en akteur Elton John Duffy, Bronwyn Reddy, Nikki Louw en Carmen Maarman in die loop van die stuk in verskeie gewade, in die liedjiedele gedirigeer het.

In die aanbieding van sowat 40 minute – waarin die Andersen-verhale “Die Prinses en die Varkoppasser” kostelik vertel is, “Die Keiser se Nuwe Klere” talle laat giggel het, en “Die Lelike Eendjie” met ’n kameeverskyning van ’n “Amerikaanse rapper” vertel is – leer ken dié gehoor stories wat nie altyd ’n gelukkige einde het nie, en laasgenoemde verhaal waarin dit wel die geval is.

In die persverklaring oor die stuk word gesê die verhoogaanpassing is na aan die oorspronklike feëverhale. Tot groot vermaak van entoesiastiese maar grotendeels ononderskeidende gehoorlede is die lelike eendjie uit ’n penarie gehelp deur ’n rapper genaamd Snoop Ducky Duck (Duffy) met ’n pet met ’n besonder lang klap (wat herinner aan ’n snawel). Dié byvoeging sit nie tuis in die stuk nie.

Die prinsesse in die verhaal van die “Prinses en die Varkoppasser” oortuig met humor meer tekenend van Shrek as van die verhaal van hooghartigheid wat deur dade geken word.

In die vorige opvoering die oggend is die krag afgesny. Die kragopwekker is dus vir die tweede ronde aan die gang gesit, maar net een vloedlig was beskikbaar om lig te werp op die donkerblou verhoog. Daar was darem klank, maar die mikrofoontjie van een van die prinsesse het ’n bietjie probleme gegee.

Verskoning is aangeteken dat spesiale effekte soos ’n rookmasjien weens die krag tot daarnatoe is.

Toe moes die akteurs hulle verlaat op hul toneelspel. En sang.