Woedende Redknapp sien rooi oor Balotelli in nederlaag teen City

MANCHESTER. – ’n Woedende Harry Redknapp, sokkerafrigter van Tottenham Hotspur, het gister hier rooi gesien en meen Mario Balotelli van Manchester City moes ’n rooikaart in Spurs se nederlaag van 2-3 gekry het.

Die omstrede Balotelli was in ’n voorval met Spurs se Scott Parker betrokke en het uiteindelik City se wendoel in die laaste sekondes van die wedstryd in die Engelse Premierliga aangeteken.

Balotelli het vroeër ’n geelkaart ontvang vir ’n oortreding op Benoit Assou-Ekotto, waarna hy in die 84ste minuut met Parker kontak gemaak het.

Die Italianer het twee keer met Parker kontak gemaak. Die tweede keer was teen Parker se kop nadat hy glo sy balans verloor en geval het.

Beamptes het Balotelli die voordeel van die twyfel gegee en sy pleidooi dat dit ’n ongeluk was aanvaar.

In die 94ste minuut het die doelskieter die City-sege met ’n strafdoel beklink.

Redknapp was nie beïndruk nie.

“Ja, ek dink so,” het hy gesê toe hy gevra is of Balotelli afgestuur moes gewees het.

“Dis nie die eerste keer wat hy so iets gedoen het nie, is dit? Ek is seker dit sal nie die laaste keer wees nie.

“Ek is die laaste een wat kan praat oor spelers wat afgestuur moet word, maar dis blatant as hy so reageer.

“Scott het ’n lieflike sny op sy kop. Ek is nie seker of hy steke gekry het nie, maar dis maar hoe dit gaan.

“Ek is verbaas die lynregter het dit nie gesien nie. Die eerste stamp kon ’n ongeluk gewees het, maar die tweede een?

“Hy het hom met die agterkant van sy voet teen die kop getref.”

) In gister se ander kragmeting het Manchester United Arsenal met 2-1 in die Emirates-stadion geklop om binne trefafstand van City op die puntelys te bly.

Antonio Valencia het een van United se doele aangeteken en die ander help maak.

City is op 54 ligapunte bo-aan die puntelys, terwyl United (51) slegs drie punte agter is. Spurs is derde op 46, Chelsea vierde op 41 en Arsenal vyfde op 36. – Sapa-AP

- Die Burger