Liverpool én Arsenal dring deur

JOHANNESBURG. – Liverpool moes 16 jaar lank wag om weer op Wembley te speel, maar ná sy sege in die vierde ronde van die FA Cup oor Manchester United is dié span nou stewig op koers om twee keer in dieselfde seisoen besoek af te lê by Engeland se beroemdste sokkerstadion.

Die Reds het hul aartsvyand eergister op Anfield op dramatiese wyse met 2-1 verslaan om deur te dring tot die volgende ronde van een van die oudste sokkerreekse op aarde.

Dít nadat hy skaars drie dae vroeër deurgedring het tot die eindstryd van die Ligabeker-reeks deur ’n gelykop-uitslag in die tweede wedstryd van die halfeindronde teen Manchester City af te dwing.

Die titelstryd van albei dié reekse vind plaas op dié Londense spogveld.

Arsenal het gister ook op dramatiese wyse tot die vyfde ronde deurgedring deur Aston Villa met 3-2 te klop.

Villa was teen rustyd met 2-0 voor, maar drie doele binne sewe minute tussen die 54ste en 61ste minuut het die tuisspan ’n sege besorg.

Twee van dié doele was strafdoele wat Robin van Persie aangeteken is.

Liverpool het Saterdag vroeg die voortou geneem toe ’n kopskoot deur die verdediger Daniel Agger David de Gea in die United-doelhok geklop het.

Die besoekers se Park Ji-Sung het die telling sowat ses minute voor die rustyd gelykop gemaak, voordat die Liverpool-plaasvervanger Dirk Kuyt die wedstryd teen die verloop van spel in die doodsnikke beklink het.

Terwyl Kenny Dalglish, die Liverpool-afrigter, sy spelers ná die wedstryd geloof het, het Alex Ferguson sý span se nederlaag beskryf as “iets om van siek te word”.

United, wat dié beker reeds 11 keer in sy roemryke geskiedenis verower het, moes sonder verskeie van sy beseerde sterre – onder wie Wayne Rooney, Phil Jones, Nani en Rio Ferdinand – klaarkom.

“Om só te verloor nadat ons die wedstryd oorheers het, is onverklaarbaar,” het die uitgesproke United-afrigter aan Sapa-AFP gesê.

• Vroeër het Tottenham Hotspur en Chelsea ook húl plekke in die vyfde ronde bespreek deur sukkelseges te behaal oor onderskeidelik Watford en Queens Park Rangers.

’n Doelwagter-blaps het Spurs se Rafael van der Vaart toegelaat om die Watford-doelnet te laat bult, terwyl ’n twyfelagtige strafdoel deur Chelsea se Juan Mata die Hoops se doppie geklink het.

Elders het Bolton Wanderers, Stoke City, Everton en Norwich City met Swansea City, Derby County, Fulham en West Bromwich Albion afgereken, en Brighton & Hove Albion het Newcastle United uitgeskakel.

- Die Burger