WP ‘mors met jonges’
2010-09-09 22:50
Kaapstad – Die Wes-Kaapse rugbybaas Peter Jooste is erg omgekrap oor die Westelike Provinsie se onvermoë om Conrad Hoffmann in die Moederstad te hou.
Hoffmann (23) trek ná vanjaar se Curriebeker-rugbyreeks Durban toe, en sal na verwagting gereeld volgende jaar vir die Sharks in die Super15-reeks skrumskakel speel.
Die voormalige Suid-Afrikaanse o.21-ster is vandeesweek voorlopig as heelagter in die Westelike Provinsie se beginspan ingesluit vir môre se wedstryd teen die Luiperds op Nuweland. Volgens die Streeptruie se afrigter, Allister Coetzee, het hy egter ’n “enkelbesering” wat hom dalk nog langs die kantlyn hou.
“Ek is baie teleurgesteld dat die WP jong spelers verloor en ouer manne van elders kontrakteer,” sê Jooste, wat in die WP se uitvoerende komitee dien en ook die hoof van Suid-Afrika se keurkomitee is.“Conrad is na my mening ’n speler met uitstaande talent, wat oor die vermoë beskik om eendag vir die Springbokke te speel.
“Ander talentvolle spelers soos Francois Hougaard, Stephan Dippenaar en Hayden Groepes is ook hier weg. Die WP moet beter na sy jong talent kyk.”
Terwyl die WP vir Hougaard en nou ook Hoffmann verloor het, het hy uit sy pad gegaan om Ricky Januarie en Dewaldt Duvenage te kontrakteer.
Die WP spog tans weer met ’n talentvolle generasie jong spelers, met sy o.19-span onoorwonne ná agt wedstryde en die o.21-span wat sewe van sy agt gewen het.
“Dis goed vir die WP dat jong spelers goed vertoon, want dit kan die toekoms van die unie verseker. Maar die vertoning van die senior span is die belangrikste,” sê Jooste.
“Daar moet ook loopbaanplanne vir die jong spelers wees. Ek dink nie ons gee vir jong spelers genoeg geleenthede nie.”
Coetzee het vandeesweek wel besluit om verlede jaar se SA o.20-speler van die jaar, Lionel Cronjé, op losskakel te kies.
Cronjé sal môre die eerste keer sedert hy hom by die WP aangesluit het ’n wedstryd in die Curriebeker-reeks begin.Terwyl hy baie tyd op die Streeptruie se plaasvervangersbank deurgebring het, het die Haaie en Leeus Patrick Lambie en Elton Jantjies onderskeidelik gereeld ingespan. Hulle word nou reeds as Springbok-kandidate vir die nabye toekoms beskou.
Die WP het boonop sy laaste drie wedstryde in die Curriebeker-reeks verloor.
Behalwe vir die skielike afwaartse kurwe nadat die WP met ses seges afgeskop het, verneem Sport24 daar heers ook ernstige kommer onder Kaapse rugbybase oor die gebrek aan transformasie in die senior span.
Die WP het in sy eerste nederlaag van die Curriebeker met Conrad Jantjes as die enigste gekleurde speler in die beginspan teen die Haaie in Durban gespeel.
Jantjes is boonop ’n klompie seisoene gelede uit Johannesburg hierheen gelok en is nie ’n plaaslike produk nie.
Morgan Newman het sedert sy herstel van ’n ernstige kniebesering nie verder as die WP se plaasvervangersbank gevorder nie.
Desondanks die ongelukkigheid wat in WP-geledere oor spankeuses en kontraktering heers, behoort die Streeptruie gemaklik weer op die wenpad te kom.
Die Luiperds het nog nie vanjaar ’n Curriebeker-stryd gewen nie.
Niks anders as ’n groot sege behoort dus vir ’n Springbok-belaaide WP-span aanvaarbaar te wees nie.