Vuiste klap voor Sonny Bill en Yank in die kryt klim

HAMILTON. – Die All Black-rugbyspeler Sonny Bill Wil­liams moet nog bewys hy kan met die bestes in die bokswêreld saamgesels, maar hy het rof genoeg gelyk toe hy met sy volgende teenstander, Clarence Tillman, by gister se inweegsessie vasgesit het.

Tillman, ’n Amerikaner, het sy humeur verloor toe dié twee van aangesig tot aangesig ontmoet het om vir fotograwe by die Hamilton-gimnasium te poseer en Williams uitdagend met hom gepraat het.

Skielik het Tillman Williams op die ken geslaan en laasgenoemde het met ’n regter-haakhou in Tillman se gesig gereageer.

Anthony Mundine, ’n Australiese beroepsbokser asook ’n voormalige rugbyliga-speler wat met Williams bevriend is, het Tillman toe na die vloer getrek en hom van Williams af weggedruk.

In ’n video-opname van die voorval wat op die Internet verskyn, kan gesien word hoe Williams sê “moet my nie homie noem nie” terwyl die twee boksers mekaar aangegluur het net voordat die houe begin val het.

Die twee se boksgeveg vind vandag plaas.

“As hy wil, kan ons nou dadelik veg,” het Williams gister gesê.

“Dis reg met my.”

Mundine het aan Fairfax-media gesê hy dink Tillman was verkeerd.

“Ek dink hy is verbouereerd. Dit was ’n baie disrespekvolle ding om te doen.

“Om iemand so uit die bloute te slaan beteken hy het alle respek en eer as ’n kryger verloor en ek hoop regtig Sonny laat hom daarvoor betaal.”

Tillman het meer as 128 kg by die inweegsessie geweeg. Dit is sowat 20 kg swaarder as Williams, wat deur die Nieu-Seelandse Rugbyunie toegelaat word om aan ’n beperkte aantal boksgevegte deel te neem.

Tillman het Richard Tutaki as ’n teenstander vir Williams vervang nadat Tutaki op verskeie aanklagte in hegtenis geneem is.

Tillman het glo aan joernaliste gesê hy het $1 000 op homself vir ’n oorwinning verwed. 

- Die Burger