Taktiese spel pla, sê Allister oor nr.10

KAAPSTAD. – Verlede jaar was dit beserings en vanjaar is dit taktiese spel.

Die losskakel-posisie bly vir die Stormers se afrigter, Allister Coetzee, ’n kopseer voor die aanvang van die Super-rugbyreeks, op 24 Februarie.

Coetzee sal na verwagting vandag Gary van Aswegen as sy nr.10 vir Saterdag se opwarmwedstryd teen die Southern Kings in Port Elizabeth aankondig.

Dit beteken dat Van Aswegen ook in die binnebaan is om die Stormers se eerste wedstryd in die Super-reeks, op 25 Februarie teen die Hurricanes, te begin.

Die Stormers-breier het tot dusver in die voorseisoen al vier losskakels – Van Aswegen, Burton Francis, Demetri Catrakilis en Kurt Coleman – op die proef gestel. Hy is egter nog nie tevrede met wat hy gesien het nie.

“Hul taktiese spel is nog nie op standaard nie,” het Coetzee gesê.

“Die vermoë om die situasie te speel, ontglip die spelers nog wanneer ons aan algemene aanvallende spel werk.

“As jy in jou eie helfte speel, kan jy ook nie net die bal na die agterspelers skuif nie. Dis dán wanneer die stewel ingelê moet word.

“Dis ook nie nodig om die bal in jou eie helfte op te neem as die tyd en ruimte daar is om die druk met ’n skop te verlig nie. Jy wil in die teenstander se helfte besit behou en hulle dwing om duikslae uit te voer. Dís die vlak waarna ek wil hê ons losskakels moet vorder.”

Die beserings het verlede jaar só onder die Stormers se losskakels gemaai dat Earl Rose selfs nader getrek is. Vyf ander spelers – Peter Grant, Van Aswegen, Lionel Cronjé, Kurt Coleman en die skrumskakel Dewaldt Duvenage – is deur die loop van die Stormers se veldtog as losskakels gebruik.

Van Aswegen se vertoning in Port Elizabeth is veral belangrik, omdat Coetzee nog nie seker is wanneer Grant se verpligtinge met die Kobelco Steelers in Japan afgehandel sal wees nie.

“Die ergste wat kan gebeur, is dat Peter vir die eerste twee wedstryde nie hier gaan wees nie,” het Coetzee gesê.

“Dalk loop hy slegs die eerste wedstryd mis, of dalk kan hy hom selfs nog voor die begin van die Super-reeks by ons aansluit.”

Dit lyk egter toenemend of ’n groot kans Van Aswegen teen die Hurricanes beskore sal wees.

In daardie geval sal hy aan ongekende druk blootgestel word, want hy kan hom tussen Bolla Conradie en Jean de Villiers as die enigste binne-agterspeler met ’n gerekende skopvoet bevind.

Coetzee meen Grant se terugkeer sal vir elkeen van die jong losskakels van waarde wees.

“Daar is sekere dinge wat ’n jong speler net by ’n ervare een kan leer. Peter sal Gary en al die ander jong losskakels help.”

- Die Burger