Skotland se groot kans

Edinburg. – Rugby se oudste vyande sê mekaar vandag weer die stryd aan wanneer Engeland op Murrayfield teen Skotland speel, maar nuwe doelwitte is op die spel vir dié bure.

Die mees onlangse tweestryd in die verhaal, wat reeds in 1871 begin het, was in verlede jaar se Wêreldbeker-toernooi in Nieu-Seeland toe die Engelse met genade ’n sege van 16-12 oor die Skotte behaal het.

Dit het Skotland die eerste keer ’n plek in die toernooi se uitklopronde gekos.

Vandag is die begin van ’n nuwe Sesnasies-reeks en Skotland het weer ’n kans om vuur te spoeg – teen ’n span wat ná die Wêreldbeker-stryd deur die Skotse afrigter, Andy Robinson, as “arrogant” beskryf is.

Skotland se geleentheid vir wraak is veral groot noudat die Engelse besluit het om hul span van voor te herbou.

Stuart Lancaster durf sy eerste wedstryd as tussentydse Engelse afrigter aan met ’n uiters onervare span, selfs al kan dié nuwelinge ook vir groot opwinding sorg.

Dit sluit die Suid-Afrikaanse tweetal van Brad Barritt (senter) en Mouritz Botha (slot) in.

Dit reën debutante in die Engelse span, terwyl net die vleuel Lee Jones in die Skotse span sy buiging maak.

Tog sal die Skotte moet leer drieë druk alvorens hulle golwe in die Sesnasies gaan maak.

Van die 20 spanne in verlede jaar se Wêreldbeker-toernooi het slegs Georgië en Roemenië minder drieë as Skotland gedruk.

Afskop: 19:00.

)Vir Frankryk het die seer van sy nederlaag van 7-8 teen Nieu-Seeland in die Wêreldbeker-eindstryd al effens verdwyn.

Maar daar is ’n ander herinnering wat by die Franse sal spook voor vandag se kragmeting met Italië in Parys.

Italië, wat slegs 8 van sy 60 wedstryde in die geskiedenis van die Sesnasies-reeks gewen het, het verlede jaar ’n skokoorwinning oor die Franse in Rome behaal.

Albei spanne het nuwe afrigters met Phillipe Saint-André wat beoog om bestendigheid by die wisselvallige Franse te kweek.

Jacques Brunel beplan om ’n meer aanvallende soort rugby by die Italianers te vestig en stel sy doelwit duidelik: hy wil Italië binne vier jaar een van die voorste ses rugbylande ter wêreld maak.

Afskop: 16:30.

)Môre se wedstryd in Dublin tussen Ierland en Wallis is die naweek se grootste trekpleister, selfs al het beserings die Walliesers erg ontwrig.

Die Iere het hoofsaaklik by hul span gehou wat verlede jaar in die Wêreldbeker-kwarteindronde teen die einste Rooi Drake verloor het.

Tog is Ierland sonder sy gewilde senterheld Brian O’Driscoll en sy plaasvervanger, Keith Earls, moes hom ook gister weens persoonlike redes onttrek.

Fergus McFadden sal nou die nr.13-trui dra.

Afskop: 17:00. – Sapa-AP en Sportredaksie

- Die Burger