Oud-Bok (35) stof stewels af vir Bolanders

Paarl - Die Bolandse bries dra vandag ’n suggestie van ou wyn in ’n nuwe wynsak.

Dít nadat die bestuur van die Boland-Kavaliers gister verras het deur sy agterlyn-afrigter en voormalige Springbok, Louis Koen (35), as losskakel te kies vir die Eersteliga-wedstryd in Wellington teen die Valke.

Koen rig sedert 2007 in die Boland af, en het intussen ook hier by sy alma mater, die Paarl Gimnasium, skoolgehou.

Tussendeur het hy en die voormalige Springbok-losskakel Braam van Straaten ’n skop-akademie op die been gebring.

Van Straaten het vandeesweek sy “intellektuele ka­pitaal” met die Wallabies gedeel. En hy het tot vroeër vanjaar gesê hy skop tans beter as in sy speeldae.

Volgens die Bolandse direkteur van rugby, Loffie Eloff, sal Koen ook vandag die kans kry om sy skopvernuf ten toon te stel.

Hieroor het Koen beskeie aan Sport24 gesê: “Jong, my skoppe gaan maar soos dit altyd gegaan het. As ek en Braam afrig, skop ons natuurlik sonder druk. Maar ek het darem hard geoefen.”

Koen se laaste wedstryd was vroeg in 2007, waartydens hy ’n ernstige besering opgedoen het. Daarna het hy uitsluitlik op afrigting gefokus.

Oor die kans om weer rugby te speel, is hy kinderlik opgewonde: “Ek het nie gedink ek gaan ooit weer die geleentheid kry nie. Ek is eerstens ’n afrigter en dan ’n speler.

“Hierdie kans is vir my ’n wonderlike seëning – meer só omdat ek die kans het om van die jonger ouens te help en in die groter spankonteks ’n bydrae kan probeer maak.”

Sy insluiting is egter nie ’n impulsiewe besluit nie.

“Louis het aan die begin van die jaar gesê hy sal graag uithelp indien dit iewers nodig raak. Hy het intussen hard geoefen en is sonder twyfel nog fiks genoeg om te speel,” het Eloff gesê.

“En kyk, ons het jong talentvolle losskakels, soos Willie le Roux, in ons midde. Ek wil hê hulle moet by Louis leer hoe om rigting aan die span te gee en om in die regte situasies die regte besluite te neem. Louis het baie kundigheid, en sy teenwoordigheid sal die ouens rondom hom vertroue gee.”

Die Kavaliers het in hul laaste vier wedstryde in die hek geduik – in twee gevalle nadat hulle in die doodsnikke ’n voorsprong prysgegee het.

Eloff het dié flaters deels aan ’n gebrek aan ervaring toegeskryf. Dat sy span vandag met ’n Springbok-skakelpaar in Koen en Bolla Conradie, asook twee Bokke as slotte – Hottie Louw en Hilton Lobberts – uitdraf, kan help om die seisoen weer op koers te kry.

- Die Burger