SA spanne Bryce eers gespaar
2012-02-09 00:00
- Artikelopsies
- Deel
- Kry Die Burger op
PRETORIA. – Soos verwag, is daar geen Bryce Lawrence in die eerste ses weke van die Super-rugbyreeks vir Suid-Afrikaanse spanne nie, met dié omstrede Kiwi wat twee keer in Nieu-Seeland en twee keer in Australië die fluitjie hanteer.
Maar dit was nie die enigste goeie nuus vir plaaslike rugbygeesdriftiges toe Sanzar gister sy bepalingslys vir skeidsregters bekend gemaak het nie.
Jaco Peyer se goeie vertonings die afgelope paar seisoene beteken dat dié blaser meer gereeld in die Super-reeks te siene gaan wees. Nóg twee plaaslike blasers, Lourens van der Merwe en Stuart Berry, maak vanjaar hul debuut in die Super-reeks.
Mike Fraser (Nieu-Seeland), Angus Gardner en Andrew Lees (Australië) is die ander debutante.
Peyper blaas drie agtereenvolgende naweke (almal oorsee), met Jonathan Kaplan (Bulls en Sharks), Marius Jonker (Stormers en Hurricanes) en Mark Lawrence (Lions en Cheetahs) wat dadelik vir diens in Suid-Afrika aanmeld.
Kaplan het gister op Twitter gesê hy sien baie uit na dié wedstryd, want hy meen verlede jaar se ooreenstemmende kragmeting tussen die Bulls en die Sharks was een van die beste wedstryde van die reeks.
“Tyd om my stewels af te stof,’ het hy getwiet.
Die derbystryde van die tweede week word deur Mark Lawrence (Stormers en Sharks) en Craig Joubert (Cheetahs en Bulls) hanteer.
Die bepalings met Suid-Afrikaanse verbintenisse vir die eerste twee weke is:
24 Feb: Bulls t Sharks, Jonathan Kaplan.
25 Feb: Waratahs t Reds, Jaco Peyper
25 Feb: Stormers t Hurricanes, Marius Jonker
25 Feb: Lions t Cheetahs, Mark Lawrence.
2 Maart: Lions t Hurricanes, Steve Walsh
3 Maart: Highlanders t Crusaders, Jaco Peyper
3 Maart: Cheetahs t Bulls, Craig Joubert
3 Maart: Stormers t Sharks, Mark Lawrence.
- Die Burger