Waugh sê Smith moet leisels los

SYDNEY. – Graeme Smith moet ’n blaadjie uit Ricky Ponting se boek neem en afstand doen van die kapteinskap van die Suid-Afrikaanse toetsspan, glo die voormalige Australiese krieketkaptein Steve Waugh.

Smith, wat verlede jaar ná die Wêreldbeker-toernooi afstand gedoen het van die kapteinskap van die eendagspan, het ’n lopiedroogte beleef in die toetsreeks teen Sri Lanka en het ’n gemiddelde van slegs 29.50 in die drie toetse gehandhaaf.

Daar is baie kritiek uitgespreek teenoor Smith, met talle ondersteuners wat glo hy moet die tuig neerlê.

Waugh stem daarmee saam, en hy glo die lopies kan weer van sy kolf vloei nadat hy afstand gedoen het van die las van kapteinskap. Dit is wat met Ponting gebeur het in die onlangse toetsreeks teen Indië.

Die gewese Aussie-kaptein het ’n honderdtal en ’n dubbele honderdtal gemoker.

“Graeme is al van ’n jong ouderdom die kaptein en hy dra daardie mantel nou al ’n lang tyd,” het Waugh aan Eyewitness News Sport gesê.

“Miskien sal dit nou vir hom goed wees om net ’n speler te wees en nie meer die kaptein nie. Ricky Ponting het dit gedoen en dit het baie druk van hom afgeneem. Graeme moet daaraan dink om nie meer ’n toetskaptein te wees nie en net sy kolfwerk te geniet.”

Waugh is ook uitgevra oor die Suid-Afrikaanse spelers se spelpeil en hy glo hulle moet meer bestendig wees as hulle as die beste span ter wêreld bestempel wil word.

“Suid-Afrika het oomblikke wanneer hy soos die beste span ter wêreld lyk, maar dan is daar weer tye wanneer hy glad nie so lyk nie,” het Waugh gesê.

“Hulle (die Proteas) is bietjie onbestendig. Hulle moes Australië in die onlangse reeks met 2-0 geklop het, maar om een of ander rede kan hulle dit nie doen wanneer die geleentheid hom voordoen nie.” – Sportredaksie

- Die Burger