Cape Cobras wil dié keer ook giftig in kitskrieket wees

KAAPSTAD. – ’n Nuwe uitdaging begin vandeesweek vir die Cape Cobras wanneer hulle gaan probeer om hul uitstekende spelpeil in die meerdaagse SuperSport-reeks in die nuwe eendaagse krieketreeks te herhaal.

Die Kaapse streekspan het die afgelope naweek net meer as twee dae nodig gehad om die Titans ’n hengse pak slae toe te dien. Die Cobras is op koers om dié vierdaagse titel die derde agtereenvolgende jaar te wen.

Die Cobras het Saterdagoggend al met die Titans klaargespeel toe hulle vir net 236 lopies in hul tweede beurt uitgehaal is. Die Cobras het die wedstryd met ’n beurt en 46 lopies gewen.

Justin Kemp, die Cobras se kaptein, was vol lof vir sy span, veral die boulers.

“Ek dink ons het die gunstige boultoestande beter as die Titans gebruik,” sê Kemp.

“Die Titans het effens kort geboul, wat dit maklik gemaak het vir ons kolwers.

Ek het ná die wedstryd aan my spanlede gesê dit is maklik om kaptein te wees as die ouens op die regte plekke boul.”

Rory Kleinveldt, die held in die eerste beurt toe sy 5/26 gehelp het om die Titans vir 112 uit te boender, het met 3/68 weer baljaar, terwyl Vernon Philander met 4/71 ook sy reputasie meer gestand gedoen het.

Philander het in die tweede beurt met vier van die Titans se vyf topkolwers klaargespeel.

Dit het die groot kanonne Jacques Rudolph en Martin van Jaarsveld ingesluit.

Dié veelsydige bouler is nou al die laaste drie jaar die mees suksesvolle bouler op plaaslike vlak en dit sal interessant wees om hom in Potchefstroom teen die Aussies in aksie te sien.

Philander is deel van die Suid-Afrikaanse A-span, wat van môre af die toeriste in dié studentedorp in ’n vierdaagse wedstryd pak.

Philander is ook lid van die Proteas se toetsgroep, maar dit is onwaarskynlik dat hy in die eerste toets sal speel, wat op 9 November hier op Nuweland begin.

Die Kapenaars se ander groot held in die wedstryd is die paaltjiewagter Dane Vilas. Hy het in uiters moeilike kolftoestande 161 in die Cobras se eerste beurttotaal van 394 gemoker.

Die Cobras is tans uitstekend op dreef en het twee van hul eerste drie SuperSport-wedstryde gewen.

Kemp weet dat die spelpeil bitter min in die eendagreeks sal beteken. Die Cobras speel Vrydag in Durban teen die Dolphins.

“Ons moet ook nie meegevoer raak met dié sege nie. Ons was redelik gelukkig om die loot op ’n moeilike kolfblad te wen,” sê Kemp.

“Ons het verlede jaar nogal klei getrap in die eendagreeks en is oorgehaal om vanjaar beter te vertoon.”