Heelwat om na uit te sien in nuwe, nasionale ‘Buite’

Daar sal aanstaande jaar nog meer op avonture, die buitelewe, kampeer, reis en die natuurlewe gefokus word wanneer Buite van 19 Januarie ’n nasionale bylae word.

Dieselfde bylae wat in Die Burger verskyn, sal dan in ons Oos-Kaapse uitgawe in Port Elizabeth en Oos-Londen gepubliseer word, asook in Beeld se uitgawes in Johannesburg, Pretoria en Durban.

Vir adverteerders wat hul produkte landwyd bekend wil stel, sal dit baie goeie nuus wees. Veral die toerismebedryf sal hopelik hierdie kans aangryp vir die wyer bekendstelling van hul produkte.

Om die nuwe bylae van stapel te stuur, word daar met ’n fotokompetisie begin.

In die Natuurmens-fotokompetisie sal lesers foto’s moet instuur van mense se aktiwiteite in die natuur.

Hou Buite op 19 Januarie dop vir meer besonderhede oor hierdie kompetisie en die pryse wat op die spel gaan wees. Lesers sal die finale wenners kan kies en ook self vir ’n vakansieprys in aanmerking kom.

Vanjaar het die Afrika-avonturier Kingsley Holgate vir ons verslag gedoen oor sy Boundless Southern Africa-ekspedisie. In ’n steekproef wat die tydskrif Sports Illustrated gedoen het, het 62% van Suid-Afrikaanse mans hom gekies as die beste voorbeeld van ’n legendariese Suid-Afrikaanse man.

Luidens ’n persverklaring word Holgate beskou as die “grootste avonturier en iemand met regtig ’n goeie hart”. Die humanitêre werk wat Holgate en sy familie in Afrika gedoen het, het beslis baie aanklank gevind.

Ook Johan Badenhorst en sy Voetspore-span het uit die Sahara vir ons verslag gedoen oor hul avonture. Hierdie span se reis van Noord-Afrika na die Kaap is tans te sien in ’n gewilde TV-reeks.

Ook die motorfietsryers van Moto-Avontuur het hul harte vanjaar oopgemaak vir behoeftige kinders en meer as R16?000 ingesamel vir ’n spesiale vakansie.

’n Groep van agt kinders word danksy hierdie poging op die jaarlikse Red Square Trans Agulhas-rubberbootvaart saamgeneem vir die vakansie van ’n leeftyd.

Melanie Davies van Moto-Avontuur en Henk van Niekerk van Zulu Overland was verlede week teenwoordig toe ’n tjek oorhandig is. Van Niekerk verskaf die vervoer en die kamptoerusting vir kinders vir die hele tog.

Johan Dormehl en sy vrou, Jenny, sal die kinders se kamp­ouers wees op hul toer wat op 28 Desember by Keurboomstrand begin en 1 Januarie in die Strand sal eindig.

Die kinders sal elke dag na die verskillende strande vervoer word waar hulle die aksie kan dophou.

Aanstaande jaar sal ons ook weer kan lees van Moto-Avontuur se uitstappies. Die eerste een is in Februarie op die Ossewa-roete.

Jacques Marais het verlede week vertel hoe hy in tonnels deur die maag van Kaapstad geloop het. Hy sal aanstaande jaar weer skryf oor sy avonture, terwyl Morné du Plessis (Voëlkyk) en Lise Beyers (Veldkos) se gewilde rubrieke wyer bekendstelling gaan kry.

Op 19 Februarie besoek dr. Flip Stander van Namibië Durbanville om ons te vertel van sy navorsing oor die woestynleeus van die Namib. Bel dr. Etienne Bruwer solank (082 774 8521) vir besonderhede en plekbesprekings.

Lesers sal aanstaande jaar ook aangemoedig word om meer nuus en foto’s aan Buite te stuur. Verlede week het ons byvoorbeeld by een van ons gereelde adverteerders gehoor die weeldeskip Sinfonia is aangewys as die passasierskip wat die lekkerste hamburgers ter wêreld maak. As die gedagte aan ’n hamburger nie jou mond laat water nie, kan jy vandag in Veldkos ’n resep vir ’n besonderse Kersgereg lees.

Geniet die Kerstyd en voorspoed vir 2010. Maak seker jy kyk op 19 Januarie na die nuwe Buite.