Hanlie Gouws skryf vanaf die SA Agulhas
2011-12-16 13:49
- Artikelopsies
- Deel
- Kry Die Burger op
Dié Suid-Afrikaanse poolnavorsingskip die SA Agulhas het verlede week op sy heel laaste vaart na Antarktika vertrek. Ná meer as 30 jaar diens in die Suidelike Oseaan en Antarktika, word die skip volgende jaar uit diens gestel. Die Burger se Hanlie Gouws is saam op die tog.
-Dis 'n flippen spesiale skip die, my ou-
Die SA Agulhas is nie sommer net 'n skip nie.
Dis 'n drywende laboratorium vir 'n verskeidenheid van wetenskaplike velde, is sterk genoeg vir die ys en gaan na van die mees afgeleë en asemrowende plekke waarheen 'n mens moontlik kan gaan.
'n Poolskip moet natuurlik in 'n absoluut perfekte toestand wees, en daarom het die departement van omgewingsake se afdeling vir Antartika en die eilande besluit om die Agulhas te laat aftree ná byna 30 jaar se diens op die oop waters.
Al die lang vaarte deur die wilde water van die Suidelike Oseaan na Marion, Gough, Tristan da Cunha en al die pad af na Antarktika was hard op die skip.
Sy toekoms is nog onseker, maar daar is reeds planne geopper om dit 'n opleidingskip te maak of om dit verder vir navorsing in te span. Al wat verseker is, is dat die Agulhas nie binnekort op die skrootwerf gaan beland nie.
Dis 'n bewys van die spesiale plek wat die Agulhas in mense se harte het dat die skip wat hom vervang die Agulhas II gedoop is, sê hoofingenieur Derek Lambert.
"Die Agulhas is die bloudruk vir die Agulhas II," sê Lambert. "Die nuwe skip is net 'n moderner weergawe van die oue. Jy sal sien, hulle lyk ook dieselfde."
Die nuwe skip gaan volgens hom beter ingerig wees vir navorsing en 'n bietjie meer gemaklik vir passasiers.
Hoewel hy al sedert 2004 op die skip werk (met 'n tussenpose van twee jaar) is hierdie vaart - die Agulhas se laaste poolvaart - Lambert se eerste vaart tot by die ys.
"Ons gaan die Agulhas mis,'' sê hy.
Dis kaptein Gavin Syndercombe se vyfde Antarktiese vaart.
"Op hierdie skip is dit nooit vervelig nie," sê hy.
En dit is nie omdat daar probleme is nie.
Ná soveel jare ter see is die meeste van die probleme wat 'n mens op so 'n tipe vaart ervaar al uitgestryk en die bemanning vaardig.
" 'n Mens kan nie te gespesialiseerd wees op die skip nie. Daar word van junior offisiere verwag om byvoorbeeld ook die noodvaartuie te kan bestuur,"
verduidelik die kaptein. "En dis is deels hoekom dit so opwindend is - jy kan iets van alles doen."
Die bemanning sal waarskynlik vanaf April, wanneer die nuwe skip aankom, verdeel tussen die twee skepe en beurtelings op die twee werk totdat 'n besluit oor die Agulhas se toekoms geneem word.
Van die bemanning is op die oomblik in Finland, waar die Agulhas II gebou word, en sal hom Kaapstad toe vaar.
Die Agulhas se laaste vaart na Marioneiland is in April. Die Agulhas II se eerste een sal waarskynlik 'n vaart na die Suidelike Oseaan in die winter wees om seker te maak als aan boort werk soos dit moet voordat die lang tog na Antarktika vroeg in Desember begin.
SA Agulhas se Trumpcard
Gebou deur: Mitsubishi Heavy Industries, Shimonoseki, Japan
Voltooi: 1977
Lengte: 111.95 m
Spoed: 12 knope (het afgeneem weens ouderdom)
Passasiers: 94
Bemanning: 44
SA Agulhas II se Trumpcard
Gebou deur: STX Finland
Voltooi: 2011
Lengte: 134 m
Spoed: 16 knope in oopwater, 5 knope in ys van 1 m dik
Passasiers: 11
Bemanning: 44