Walvisbaai: Kom vang hier wonderwerke vas
2010-05-03 10:22
- Artikelopsies
- Deel
- Kry Die Burger op
Walvisbaai is geseën met wye landskappe, pragtige uitsigte en eiesoortige mariene en plantlewe.
Met ’n eindelose verskeidenheid buitemuurse aktiwiteite en avonture sal jou besoek aan die Skedelkus ’n onvergeetlike een wees.
’n Eiesoortige ervaring
Walvisbaai is goed gepas vir die buitemuurse leefstyl. Die gebied spog met sport soos sandplankry (sandboarding), wisselruitery (kiting), branderplankry, hengel, seiljag, gholf en ander binne- en buitemuurse sport.
Gedurende die Desember-vakansie lok Walvisbaai en sy omliggende oorde duisende besoekers wat in die son wil ontspan. Dit is ook dan wanneer hengelaars kus toe stroom om van die grootste en beste gehalte vis in Afrika, soos steenbras en kabeljou, te vang.
Die Dolphin Park- en Long Beach-oorde lok vakansiegangers wat die luuksheid van goed toegeruste verblyf en geriewe naby aan die see begeer. Toergidse bied verskeie toerpakkette van vierwielmotorfietsry en veldvoertuie tot seekosekspedisies en skilderagtige ritte in ’n vliegtuig.
Ongetwyfeld tussen die mees bekende landtekens in Namibië is Duin Sewe, een van die hoogste koppe in die rits duine langs die kus. Met piekniekplek en deur palmbome beskut, is hierdie sandduin gewild vir sandplankry X net om hom te klim vir die uitsig van bo is ’n avontuur in sy eie reg.
Walvisbaai-strandmeer en wateraktiwiteite
Die heersende Suid-Westelike wind skep die ideale toestande vir talle watersporte. Regattas word deur die Walvisbaai-seilbootklub georganiseer.
Die strandmeer is ’n internasionale Ramsar-toevlugsoord vir voëls. Bereken om 3 500 jaar oud te wees, is dit een van die belangrikste kusvleigebiede in Suider-Afrika. Dis ’n moet vir voëlliefhebbers en is ’n weiveld vir 200 000 voëls van 50 spesies.
Verder suid lê die rooi tot blou skakerings van die grootste soutverdampingsvelde in Afrika wat werk met sonkrag.
Kaapse pelsrobbe, watervoëls, stompneusdolfyne en nou en dan seeskilpaaie en walvissse word ook bespeur.
Die Hoofweg, ’n paar kilometer noord van Walvisbaai, bied ’n uitsig oor ’n 17 000 m² groot guanoplatform, waar duisende voëls nes maak.
Kuisebrivierdelta
Hierdie gebied was vir 2 000 jaar die tuiste van Koi-nomade en hulle afstammelings, die Topnaars, woon steeds in hierdie stugge omgewing waar hulle skape en bokke oppas.
Namib Naukluft Park
Die Namib Naukluft Park lê suid-oos van Walvisbaai en is die tuiste van een van die wêreld se vreemdste plante, die Welwitschia. Hierdie eiesoortige plant kan ongeveer 1 000 jaar oud word. Troppe gemsbok, springbok, sebra, bobbejane en klipspringers, sowel as volstruise swerf op hierdie vlaktes rond.
Sandwich-hawe
Sandwich-hawe, wat 48 km suid van Walvisbaai af geleë is, is in die 1800’s as diepwater-ankerplek vir seilskepe gebruik. Hierdie gebied is deel van die bewaringsgebied wat sorg dat spesies voëls en seelewe floreer.
Voëlkyk in die Walvisbaai-strandmeer
Hierdie strandmeer vorm deel van die Walvisbaai Ramsar-terrein, beskou as die belangrikste vleigebied langs die kus in Suider-Afrika. Talle mense besoek die strandmeer om flaminke en ander spesiale voëlsoorte te kan sien.