Beleef Etosha se ongerepte natuur

Etosha is een van die wêreld se laaste groot wildernisse en ’n kritieke toevlugsoord vir baie van Afrika se vinnig-krimpende voël- en wildspesies, insluitende die ernstig bedreigde swart renoster, die bastergemsbok en skaars swartgesig rooibok (impala).

Etosha bied ’n tuiste vir meer as 114 soogdier- en sowat 340 voëlspesies en is een van die wêreld se grootste nasionale parke wat strek oor meer as 350 km van oos tot wes en 22 275 m² beslaan.

Sentraal tot die park en waarvandaan sy naam afgelei word, is die 6 133 m²-pan, eens ’n eindelose binnelandse see wat geleidelik droog geword het. Dié droogwording was as gevolg van klimaatsveranderinge en topografiese bewegings wat later daartoe gelei het dat die groot Kunenerivier, wat die pan gevoed het, rigting verander het en eerder in die Atlantiese Oseaan begin vloei het.

Vandag is die Etosha-pan ’n verlate herinnering van dié destydse meer, ’n skynbaar eindelose put met groenerige wit klei, modder en mineraalsout wat agtergebly het soos wat die water verdamp het tussen twee en 10 miljoen jaar gelede.

Die pan was in menseheugenis nog nooit heeltemal vol water nie ten spyte van die feit dat verskeie syriviere soos die Ekuma- en die Oshigamboriviere in die noordweste en die Omuramba Ovambo in die ooste in tye van goeie ­reënval steeds water daarnatoe aflei.

Sulke reënvalle veroorsaak gedeeltelike oorstroming wat tot gevolg het dat groot hoeveelhede water oor die pan vloei en duisende flaminke, waadvoëls en ander watervoëls hierna kom.

 Die ­voëls maak hul verskyning oornag en die pan wemel dan met lewe terwyl die water stilweg terugvloei, verdamp en weer verdwyn, en so dié dor landskap leeg laat met slegs lug­spieëlings wat dans oor die pan se soutkors-oppervlak.

Hoewel die Etosha-pan tot die park se naam gelei het en dit ongetwyfeld ’n sentrale eienskap daarvan is, is die pan nie die eintlike “park” nie.
Die omliggende soetveldvlaktes wat spruit uit ’n uitgebreide samestelling van sand, gruis en nimmereindigende troppe wild, is eintlik wat die indrukwekkende natuurlewe van die Etosha Nasionale Park uitmaak.

)  Inligting met vergunning van Visions of Africa.