’n Teelaarde vir korrupsie

Dit sou seker redelik gewees het om te verwag dat nuwe raadslede wat in verlede jaar se plaaslike verkiesing ingestem is, daadwerklik sou probeer om dienste te verbeter nadat die ANC erge kritiek oor gebrekkige dienslewering verduur het.

Dit lyk egter of die ANC-politici niks geleer het nie. Die nuwe geslag raadslede kon nie wag om self op die soustrein te klim nie.

Dit is die gevolgtrekking waartoe gekom is in die tesourie se jongste verslag oor die geldelike posisie van Suid-Afrikaanse munisipaliteite.

Volgens die tesourie is politieke inmenging een van die vernaamste redes waarom 66 van die 262 Suid-Afrikaanse munisipaliteite in finansiële nood is en nog 37 op die randjie daarvan staan.

“Dit blyk duidelik uit koerantartikels dat party nuwe burgemeesters meer begaan is oor hul ‘ampsmotors’, verblyf en byvoordele as om hul gemeenskappe te dien,” lui die verslag.

Burgemeesters en rade neem volgens die tesourie besluite wat strydig is met goeie korporatiewe bestuur.

Die ander rede vir die benarde toestand is ’n gebrek aan finansiële bestuursvermoë.

Ná die verkiesing verlede jaar is hoë beloftes gemaak dat net kundige amptenare in poste aangestel sal word, maar volgens die tesourie se verslag het dit nie gebeur nie.

Nuwe politici het klaarblyklik selfs bekwame amptenare uitgewerk nadat hulle aangestel is. Waar die posbekleër korrup of onbekwaam is, het dit sin om hom te vervang, maar as dit gedoen word om ’n vertroueling of politieke bondgenoot aan te stel, ondermyn dit die doelwit om die amptenary te depolitiseer, lui die verslag.

Die gevolg is ’n gebrek aan finansiële bestuursvermoë. Swak finansiële stelsels skep ’n omgewing waarin korrupsie floreer.

Die tesourie se verslag is verdoemend. Die vraag is net hoe lank Suid-Afrikaanse kiesers nog met dié stand van sake tevrede gaan wees.

- Die Burger