Krieket SA moet sy sake in orde kry

Die getuienis wat na vore kom in die Nicholson-kommissie na die geldsake van Krieket Suid-Afrika (KSA) sal aanhangers van die spel dwars in die krop steek. By diegene is onkreukbare bestuur deur die administrateurs van ’n professionele sport ’n geldige verwagting.

Prof. Mervyn King, voorsitter van die komitee wat die King III-verslag oor goeie korporatiewe beheer opgestel het, het onlangs gewys op die belangrikheid van deursigtigheid en ’n goeie korporatiewe reputasie. Dit geld des te meer ’n sportliggaam wat talent en borgskappe bestuur.

’n Reukie het om die geldsake van KSA gaan hang toe rolspelers in 2009 gevra het om die kontrak te sien wat gesluit is vir die aanbieding van die Indiese Premierliga-toernooi (IPL).

Mnr. Gerald Majola, uitvoerende hoof van KSA, het bonusse van R1,8 miljoen ontvang wat onder meer uit die toernooi gespruit het.

Majola het die bonusse nie verklaar nie en dit het gelei tot die ondersoek.

Die getuienis wat nou voor regter Chris Nicholson dien, laat ’n bitter smaak in die mond van lojale krieketondersteuners.

Die spel wat die botoon voer in die raadsale van KSA is blykbaar nié krieket nie, maar ’n politieke magspel waarvan die einddoel selfverryking is.

Dit is beswaarlik moontlik om te verwag krieketspanne moet transformeer, ontwikkel en presteer as die administratiewe liggaam wat leiding moet verskaf in soveel chaos en verdeeldheid gedompel is.

Die spel sit reeds internasionaal met die skandvlek van oneerlikheid weens voorvalle van wedstrydknoeiery.

Dié reputasie word nou verder geskaad deur dit wat in die Nicholson-kommissie onthul word.

Dit maak toeskouers kriewelrig en skrik borge af. Op die ou end is dit die spel wat daaronder ly.

KSA se sake moet nóú in orde gekry word, hoe pynlik dit ook al is.

Krieket was nog altyd ’n spel vir gentlemen. Dit hoort nie in die hande van korporatiewe geldwolwe nie.

- Die Burger