Inisiatief teen korrupsie bring meer hoop

Die nuwe korrupsie-waghond ­Corruption Watch (CW) is die hoopvolste inisiatief in die laaste jare in die stryd teen korrupsie.

Daar is velerlei redes hiervoor.

Eerstens kom dit met die steun van Cosatu, ’n bondgenoot van die ANC.

Dieselfde Cosatu wat verkiesing ná verkiesing stemme werf om die ANC te laat regeer, maar wat nie sy regering vertrou om korrupsie uit te roei nie.

Tweedens staan dit onafhanklik van die regering. Die uitvoerende direkteur is mnr. David Lewis, voorheen voorsitter van die Mededingingstribunaal, en die raadslede is gesiene Suid-Afrikaners uit die burgerlike samelewing.

Laastens wil CW soveel moontlik mense betrek deur die internet en sosiale media te gebruik om alle korrupsie – hoe klein ook al – aan te meld.

Hopelik sal dit tot ’n groter bewusmaking onder alle Suid-Afrikaners lei dat geen korrupsie geduld moet word nie.

Nie die “koeldrank” (’n R100-noot in die ID-boekie om ’n groter boete vry te spring) aan ’n verkeersbeampte nie en ook nie die R50 in die hand vir die werker by die munisipale vullisterrein om bourommel af te laai in ’n plek vir tuinvullis nie.

Die nadeel van CW is dat hy nog betreklik klein is. Hy kan nie self sake ondersoek nie, maar sal dit na gepaste wetstoepassers verwys, wat ook korrup kan wees.

Mnr. Jeff Radebe, minister van justisie, en die regering se steun hiervoor lyk na blote lippediens.

As die regering wil, kan hy baie gou grootskeepse korrupsie stop met drie eenvoudige stappe.

Die eerste is om staatsamptenare te verbied om hul eie ondernemings te bedryf, die tweede om toe te sien dat tenderprosedures streng gevolg word, en die derde is strenger optrede teen korruptes.

Net so is Radebe se lof vir die media oor korrupsie opperste skynheiligheid.

CW het juis tot stand gekom omdat die regering nie met korrupsie vertrou word nie en dat hy wetgewing wil instel om dit moeiliker vir die media te maak om korrupsie oop te vlek.

- Die Burger