Die goeies in die ANC moet nou opstaan

Die viering van die ANC se eeufees is ’n historiese mylpaal waarmee die party gelukgewens moet word.

Dat ons vandag ’n grondwetlike demokrasie het, waarin alle rasse stemreg het, is ’n nalatenskap waarvoor die ANC in geen geringe mate lof verdien. Uiteraard was daar ander rolspelers en ander faktore betrokke by die struggle en die uiteindelike vreedsame oorgang, maar niemand kan ontken dat die ANC, en sy leiers soos mnr. Nelson Mandela, ’n groot rol gespeel het.

Wandade was daar wel, ook gedurende die bevrydingstryd. Wat die ANC se heerskappy sedert 1994 betref was daar ook talle laagtepunte, insluitend pres. Thabo Mbeki se benadering tot MIV/vigs, stille diplomasie jeens Zimbabwe, en die wapenskandaal wat tot vandag toe by die ANC spook.

Enige eeufeesviering moet ruimte laat om die positiewe en die negatiewe in die kollig te plaas sodat daar tot ’n realistiese beskouing gekom kan word oor wat die toekoms moet inhou. Dit is in hierdie opsig dat dit lyk asof die ANC-eeufeesviering, waarop miljoene rande uitgegee word, daarop afstuur om ’n verlore geleentheid te word.

Die oomblik is met groot prag en praal in Bloemfontein gevier. Wat egter grootliks misgekyk is, is die gevaarlike tekens dat die regerende party sonder veel morele wroeging die einste waardes waarvoor hy eens gestaan het, vertrap.

In talle opsigte is die Grondwet die sluitstuk van die bevrydingstryd, die dokument wat die ideaal verteenwoordig dat een groep mense nooit weer ’n ander groep mag verdruk nie. Tog is talle van die waardes in dié dokument, wat die grondslag van ’n gelykheidsamelewing vorm, vandag onder druk. Spraakvryheid, die onafhanklikheid van die regbank, eiendomsreg en selfs nie-rassigheid is maar enkele waardes wat in die spervuur is.

Vandag, net soos 100 jaar gelede, is daar goeie mense in die ANC. Die groot vraag is egter wat dit gaan verg voor hierdie goeie mense bereid is om na vore te tree, en die kommerwekkende tendense in eie geledere by die naam te noem sodat iets daaromtrent gedoen kan word. Dít sal die grootste geskenk wees wat enigiemand die party kan gee.

- Die Burger