Knus in die hart van fynbos
2011-11-25 22:16
’n Mens het nodig om af en toe weg te breek en te voel dit was jou tyd en geld werd. Dis só met KolKol.
Jy weet nie wat om te verwag as jy deur Botrivier ry en oor die treinspoor met die grondpad koers kies in Villiersdorp se rigting nie. By KolKol gekom is die pad hier en daar ’n uitdaging, veral as jy bo by die tente gaan bly, so los jou blink motor by die huis. Dis egter als deel van die ervaring.
Die omgewing is ongerep en die inspirasie vir die strukture kom uit liefde en respek vir die natuur. Die geboue is hoofsaaklik van uitheemse bome soos denne, populier en bloekom gebou wat op die Oude Molen-plaas en buurplase uitgekap is.
Karen en Rudi Oosthuyse het op universiteit ontmoet en Rudi het tóé reeds tekeninge gemaak van die houthuis wat hy op hul fynbosplaas wou bou, vertel Karen.
“Hy en ’n paar werkers het in 2006 aan die eerste houthuis begin bou, self die bome gesaag, die bas afgeskil en behandel. Die idee kom van die handgemaakte Kanadese houthuise.”
Die permanente luukse tente is in 2008 opgerig, die Bugsy Log Cabin is in 2009 voltooi en die restaurant is in 2010 aangepak.
“Teen dié tyd het Edmund Viljoen, mede-eienaar en sjef, vir ses maande saamgebou. Hoe baie sjefs kan sê hy het sy eie kombuis gebou?”
Eet gerus hier
Die restaurant The Kitchen@KolKol is van verskillende soorte inheemse hout en klippe gebou wat op die plaas uitgekap is. Die tafels is gemaak van wynvatstawe wat aanmekaar gelym is en hier en daar natuurlik van mekaar weggetrek het. Die kaggel is net ’n groot opening waarin ’n vuur hoog brand.
Groot glasvensters nooi die natuur en uitsig oor die heuwels en die Babilonstoren-berge binne.
Hy is moeg vir fancy kos, sê Viljoen, wat onder meer by die bekroonde Fat Duck-restaurant in Engeland gewerk het. Hy kook stewige en “besige” eenvoudige disse soos peri-perihoender met aartappels en botterskorsie of ’n sirloin-gereg wat óp ciabatta en ónder gekarameliseerde uie bedien word.
’n Nag in die berg in ’n warm poel
Teen die tyd dat jy klaar geëet het, is die poel by jou Bugsy Cabin reeds louwarm gestook.
’n Stofie is onder die water aan die kant van dié swembadjie vasgebout. Hierin maak jy ’n vuur wat die water verhit. Volg net die instruksies. “Dit was so gewild dat ons besluit het om een by elke eenheid te bou. Dit is waarlik ’n groot trekpleister.”
Die donkie moet net die heeltyd met hout gestook word totdat die water ’n gemaklike en luilekker 38 °C bereik. As jy seker maak jy vou die termiese kombersie ná die aand se gebruik terug oor die water, wag daar die volgende oggend ’n stomende bad – ongeag wind of reën.
In die somer sal die eerste strepie son jou net ná 05:00 deur die groot vensters wakker maak, net betyds om die sonsopkoms uit ’n warm poel met ’n koppie koffie te waardeer.
Die meeste gaste haak beslis by dié innoverende “warmbad” vas, maar om jou vel teen totale verrimpeling te red, kan jy die kaggelvuur in jou huisie gaan aanblaas. Dan is hier ook geen TV nie, dankie tog!