Kersplesier in Europa
2011-11-11 23:00
Europa begin al middel November sy Kersbaadjie aantrek. As jy die eerste keer ’n Kersmark in Europa besoek, verstaan ’n mens ander se alewige gehunker na ’n wit Kersfees, skryf LINDA DE BEER.
Dan is dít hoe Kersfees moet lyk. En ruik. En voel.
Al vyf sintuie spring eensklaps in hoogste rat as jy die eerste keer ’n Kersmark in Europa besoek. Anders as in Suid-Afrika is die hoofdoel van Kersmarkte in Europa nie om geskenke te smous nie. Dit is die Europeërs se manier om die wonder van Kersfees gemeenskaplik te midde van ysige temperature te ervaar en te beleef.
Hulle word uit die knusheid van hul warm huise gelok deur die geure van kaneel, naeltjies, geroosterde kastaiings en stomende glühwein wat met die klanke van eeue oue Kersmelodieë meng.
As dit dan nog boonop sneeu, is die ervaring soveel intenser. Dis hoekom Kersmarkte in en naby die Alpe so gewild is. Of dit nou Duitsland, Oostenryk, Switserland, Italië of Frankryk is.
Want om toegewikkel in ’n warm jas, serp om die nek en mus oor die ore jou hande om ’n warm beker glühwein te vou en jou oë na die wit berge op te slaan, is amper ’n magiese ervaring. Veral as die son skyn en die berge teen die blou lug afgeëts is. Of op ’n wolklose, maanverligte aand.
Die Kersvader in sy tradisionele uitrusting en regte baard lyk mos of hy hier tuishoort. Miskien speel hy selfs ’n draai-orreltjie wat Kersmusiek voortbring. En as die kinders ’n paar sent in sy blikkie gooi, word hulle met ’n koekie of sjokolade beloon.
Glühwein is warm wyn waarby speserye en soms lemoensap gemeng word. Dit is in ’n rooi én wit weergawe te kry. Vir die kinders en mense wat nie van die glühwein se alkoholsmaak hou nie, is daar ’n nie-alkoholiese weergawe met vrugtesappe.
Die meeste Kersmarkte laat spesiale glühwein-bekers maak waarvoor mens ’n deposito moet betaal. Toeriste kan dus die bekers as ’n aandenking hou as hulle wil.
As die wyn jou van binne laat gloei, soos die naam tereg voorstel, kan jy iets te ete soek by een van die baie kosstalletjies. Daar is worsies, kase, spek, brood en spesiale seisoensgebak soos Lebkuchen (’n soort speserykoekie) en Schneeballen (soet, ronde gebak van verskillende dekadente bestanddele wat soos sneeuballe lyk).
Geskenke vir die mense by die huis is daar tog baie. Van dié wat jy nêrens anders ter wêreld sal kry nie, sluit in handgemaakte Kersversierings, staltonele van Jesus se geboorte en ander handwerk eie aan die omgewing waar jy is.
Verskillende vorme van vermaak, soos kore wat Kersliedere sing, straatteater vir kinders en antieke mallemeules met perdjies en koetse, word by die meeste markte aangebied.
Hier is ’n paar Kersmarkte wat die moeite werd is om te besoek. Hulle begin einde November of vroeg in Desember en die meeste is tot vroeg in Januarie oop.
Füssen, Oberammergau en Ettal in Duitsland
Dié drie dorpies digby die Alpe in die Duitse provinsie Beiere is boonop in ’n omgewing wat wemel van kastele, waaronder die bekende Neuschwanstein. Oberammergau is ook bekend vir die Passiespel wat hier gehou word, Ettal vir sy klooster en Füssen vir sy besonderse oustad-gebied.
Innsbruck
Die “hoofstad van die Alpe” spog met vier Kersmarkte. Die historiese oustad word in ’n wonderwêreld omskep, waar reuse en karakters uit al die bekende sprokiesverhale mens in die smal straatjies begroet. Daar is ’n tweede mark in Maria Theresiastraat, die stad se hoofstraat wat gedeeltelik slegs vir voetgangers toeganklik is, en ’n derde op die markplein langs die rivier. Vir ’n regte Alpe-atmosfeer en wonderlike uitsigte op Innsbruck is die mark by die Hungerburg teen die hange van die berg buite die stad die regte plek om te wees.
Konstanz aan die Bodensee in Duitsland
Hier waar Duitsland, Oostenryk en Switserland bymekaarkom, is Konstanz se Kersmark met sy meer as 130 stalletjies ’n hoogtepunt. Dit is versprei oor die sentrale deel van die stad, langs die meer-oewer en selfs op bote. Voor jou lê Duitsland se grootste meer, Bodensee, en agter jou troon die sneeubedekte pieke van die Alpe. Net oorkant die grens in Kreuzlingen, Switserland, kan jy heerlik aan dié land se sjokolade smul.
Murano in Italië
Kyk hoe ’n meester-glasblaser die mooiste Kersversierings skep in dié stad in die noorde van Italië. Dié Kersmark is bekend om sy Feuerzangenbowle (vuurtongpons), wat ietwat afwyk van die tradisionele glühwein. Suikerbrood word in rum gedoop en in ’n koperdrom oor ’n vuur gesmelt. Dié konkoksie word dan by ’n vat rooiwyn gegooi.