- Artikelopsies
- Deel
- Kry Die Burger op
US-taaldebat keer terug na benede peil
deur Prof. Christo Viljoen
2011-12-29 21:09
Jason Lloyd se artikel “Bring tog maar dié offer vir Afrikaans”(DB, 27.12) trek die peil van die taaldebat aan die Universiteit Stellenbosch (US)terug na die vlak wat voorheen gehandhaaf is deur die teenstanders van ’n US wat as ’n inklusiewe Afrikaanse universiteit meertaligheid beoefen.
Hy maak gebruik van diesulkes se etikettering en die gebruik van skelname soos “taalbulle” (nogal mét andermaalse identifisering van die kleur van hul skoeisel). Hy het kennelik nie die talle praktiese voorstelle van die pro-Afrikaanse debatsdeelnemers gelees (of verstaan) nie.
Hy bring egter ’n nuwe dimensie na die taaldebat deur die rassetamboer te slaan: Die “debat op Stellenbosch wat hoofsaaklik deur wittes gedryf word”.
Hy wil die US opsaal met die erfsonde van apartheid, maar vergeet ’n rektor soos prof. Mike de Vries wat sy rug teen die apartheidsregering styf gemaak het toe hulle rasseskeiding op universiteitsvlak wou afdwing deur middel van subsidie-weerhouding.
Hy negeer die taalstryd van ’n eeu gelede teen dié wat die Victoria Kollege nie universiteitstatus gegun het nie en ’n enkele Engels-eksklusiewe Wes-Kaapse universiteit voorgestel het.
Hulle wat ’n Stellenbosse universiteit met Nederlands/Afrikaans as onderrigtaal voorgestaan het, se ideaal is verwesenlik danksy ’n skenking van £100000 (nagenoeg R200miljoen in vandag se geldwaarde) deur die weldoener Jannie Marais. Wie gaan hom dit nadoen vir Lloyd se “Afrikaanse” universiteit “wat hoofsaaklik deur bruin of swart Afrikaanses bestuur word”?
Lloyd se ondeurdagte voorstel regverdig nie ernstige oorweging nie en maak geen sinvolle bydrae nie.
Prof. Christo Viljoen
President: US Konvokasie