- Artikelopsies
- Deel
- Kry Die Burger op
US kan nie by private verblyf ingryp
deur Prof. Magda Fourie-Malherbe
2012-01-30 18:52
Die bestuur van die Universiteit Stellenbosch (US) neem met besorgdheid kennis van die inhoud van die brief “US moet ingryp in verblyf-uitbuiting” (DB, 21.01).
Die US werk reeds geruime tyd saam met die plaaslike owerheid om studenteverblyf beter te reguleer en het insette in beleidsdokumente oor hierdie saak gelewer. Die dokumente is by die munisipaliteit beskikbaar.
Die US is ongelukkig nie by magte om woonstelle en kamers wat deur private persone of instansies aan studente verhuur word, goed te keur of te inspekteer nie. Indien private verhuurders met die US saamwerk, kan die US wel minimumstandaarde voorstel en inligting oor sodanige huisvesting aan ouers en studente beskikbaar stel. Gegewe die groot behoefte aan verblyf in en om Stellenbosch, verkies private verhuurders egter gewoonlik om hul eie reëlings te tref.
Die universiteit werk doelgerig daaraan om die uitdaging van verblyf in Stellenbosch die hoof te bied. Planne is onderweg om in die komende maande in ’n eerste fase van konstruksie 716 addisionele beddens op die Stellenbosch-kampus beskikbaar te stel.
Prof. Magda Fourie-Malherbe
Viserektor: onderrig, US