- Artikelopsies
- Deel
- Kry Die Burger op
Poniepersagtige beriggewing is laakbaar
deur Hermien Basson
2012-01-30 05:06
Ek vind dit laakbaar dat Die Burger op die voorblad dit as feit aanbied dat die Voortrekkers dagga gerook het (“Die Voortrekkers het boom gerook...”, DB, 21.01).
Dit terwyl die skrywer, Robin Binckes, in die tersaaklike artikel in By erken “dit staan nêrens swart-op-wit dat die trekboere en Voortrekkers dagga gerook het nie”.
Om dit nog meer sensasiewekkend te maak, word die woorde “seks, dwelms, volkspele” in hoofletters op die voorblad geplaas met ’n Voortrekkerwa daarnaas. Die skrywer “bieg” eweneens dat wat die sekstonele in sy boek Canvas under the Sky betref, “hy ’n bietjie oordryf (sic) omdat die storielyn en die gebeure dit vereis het”. (Dis nie slegs oordrywing nie; dis absolute versinsels!)
Binckes duld dit nie dat naslaanwerke die trekboere “stokkerig en tweedimensioneel” uitbeeld nie. “Al wat hulle doen, is kerk toe gaan, bid en Bybellees.” Gevolglik versin hy ’n derde donker, degraderende dimensie wat nou as waarheid op die voorblad van Die Burger aangebied word.
Wat sou die motivering wees om hierdie ondermynende onwaarhede oor die Voortrekkers te skryf?
Dan kapitaliseer die skrywer in sy volgende boek, The Great Trek Uncut, op beskrywings van reisskrywers wat Trekkers blykbaar skets as “unwilling to work and unable to think”. Tog snaaks dat die “lui en traag” en dom trekboere enkele dekades later die magtige Brittanje in die Eerste Anglo-Boereoorlog (1880-1881) verslaan het.
Ek glo Die Burger is beter aan sy lesers verskuldig as hierdie poniepers-agtige beriggewing.
Hermien Basson
Wellington