- Artikelopsies
- Deel
- Kry Die Burger op
Oor Malema, Krog en versoening
deur Breyten Breytenbach
2009-11-13 00:07
Ek dink Antjie Krog slaan die bal ’n bietjie skeef betreffende die beweegredes vir Julius Malema se optredes.
Dat rassisme springlewendig is hier en bykans oral ter wêreld, is so waar soos ’n donkie. Dis ’n feit dat wit mense in die algemeen geen begrip het of selfs kan hê van die dieptes van ellende en lyding van swart mense deur die eeue nie, wat aan hulle toedoen toegeskryf moet word. Dat die media in hulle roederlose gebrek aan ’n morele deontologie die vure stook, onder meer deur die verguising van onbevoegde swart bedryfsleiers en politieke trogvrate, word daagliks oor die blaaie geblaker.
Dat die oorgrote medemensliewende meerderheid siek en sat is vir die gemors in Suid-Afrika en ook versot is op die eina-lekker rillings van sensasie, is tog duidelik.
Maar dat Malema “ ’n gebrek aan begrip” verwoord? Aikôna. Buitendien, dis nou regtig neerbuigend om hom so te wil sien – amper asof hy nie anders te kere kan gaan gesien sy geskende agtergrond nie.
Malema is nie ’n slagoffer van rassisme nie. Of nie meer nie: as trotse aktivis het hy immers die imperialiste verslaan en hy sien enige dag kans vir hulle kinders ook. Hy is eerder die dikgevrete produk van ’n kultuur van toe-eiening. Hierin verlustig hy hom soos die spreekwoordelike werfdier wat in die modder rol.
Indien Krog by implikasie wil betoog dat Versoening met kleed om die enkels in die veiligheidsdraad verstrik geraak het, stem ek met haar saam. Met wie en vir wat sou Malema hom ook moet versoen?
Ek vermoed Malema verwoord die versugting van ’n beduidende persentasie swart mense dat die wittes so gou moontlik moet padgee, met dien verstande natuurlik dat hulle hul sleutels, karre, beursies, aandele, selfone, vuurwapens, drank, tuinvurke en dergelike agterlaat. Ek dink Malema verwys daarna as ’n “oorhandiging van vaardighede”.
En ek is bevrees dit gaan nie veel méér begrip kweek wanneer wit mense op die knieë kruip en mea culpa blêr nie. Ek glo nie die ander wang gaan die onvermydelike kan keer of afkeer nie.