- Artikelopsies
- Deel
- Kry Die Burger op
Nuwe Maties bou voort op ou tradisies
deur Ané Beukes
2012-02-04 03:32
Ek verwys na die brief “Jool was veel meer as net blommetjies vou”. Dit spyt my dat mnr. Beukes nie meer ingelig is oor kampusaktiwiteite nie.
“Jool” is deur “MADsquared” vervang. Dit staan vir “Making a decision to make a difference” – iets wat die nuwe generasie Maties moes doen omdat dinge soos vlotte duisende gekos het wat die gemeenskap ontneem is. Die hoofdoel van MADsquared is om die fokus terug te plaas op gemeenskapsdiens en -ontwikkeling.
Ek nooi mnr. Beukes hartlik om meer te wete te kom oor aktiwiteite in die verwelkomingstyd. Hy sal verbaas wees oor die hands-on manier waarop eerstejaars by die gemeenskap betrokke raak, sonder om duisende aan nie-herwinbare materiale te spandeer. Gemeenskapsdag op 3 Februarie was ’n voorbeeld hiervan.
Ek wil hom ook verseker dat die bou van ’n groepsidentiteit en -trots steeds ons sekondêre doelwit is. Clusterdag, March 4 Madness, Vensters en Bondelsport is van die aktiwiteite wat hierdie doelwitte nastreef en bereik.
Die nuwe generasie Matie ontken nie die tradisies van ouds nie; ons bou slegs voort daarop. Ontwikkeling moet plaasvind om stagnasie te voorkom.
Ané Beukes
Stellenbosch