- Artikelopsies
- Deel
- Kry Die Burger op
‘Local’ is lekker, ook vir Juju-klerereeks
deur Johann Baard
2011-12-30 18:31
Ek het die berigte oor die nuwe klerereeks wat deur Julius Malema geïnspireer is, met ’n groot skeut skeptisisme gelees.
Die ontwerper, Obakeng Ramabodu, het na berig word gesê die Juju-reeks gaan (nogal) in China gemaak word omdat Suid-Afrika nie oor die masjinerie beskik om klere van hoë gehalte te maak nie.
Klere word nie deur masjiene gemaak nie, maar deur hoogs vaardige werkers, wat baie belangriker vir die produksie van klere van gehalte is as die tegnologie wat betrokke is.
Tweedens is die tegnologie vir die maak van klere, barette en pette wel in Suid-Afrika beskikbaar en van dieselfde standaard as die meeste wat in China aangebied word. Die belangrikste verskil is die produksiekoste en dus die ruimte vir winsmaksimering deur die plaaslike verkoper.
Die Apparel Manufacturers of SA (Amsa) bly oortuig dat ’n duidelike onderskeid getref moet word tussen “mededingendheid” en “produktiwiteit”. Suid-Afrikaanse klerevervaardigers is oor die algemeen baie produktief. Talle voldoen aan wêreldgehalte-vervaardigingstandaarde, wat onafhanklik gemeet en geëvalueer word.
Desondanks is daar baie redes waarom hulle nie altyd internasionaal mededingend is nie: Ons arbeids- en materiaalkoste, die reuse-subsidies wat Chinese vervaardigers kry, ’n onmededingende wisselkoers, doeane-bedrog en onwettige invoere. Belanghebbers in ons sektor maak belowende vordering om oplossings te vind.
Ek wil Ramabodu vra om my kantoor te kontak voordat hy sy bestelling met China bevestig. Alle patriotiese burgers, met inbegrip van Malema, sal bevestig “local” is lekker!
Johann Baard
Uitvoerende direkteur: Amsa