- Artikelopsies
- Deel
- Kry Die Burger op
Keer die sloping van 1928-huis in Stellenbosch
deur Hannes Meiring & Chris Stander
2010-02-02 22:55
Agter die Moederkerk in Stellenbosch is daar ’n doodloopstraatjie, Minseriestraat. Die laaste drie huise regs, nr. 1, 3 & 5, is eners met dieselfde gewel en datum (1928) daarop, gebou deur die destydse hardewarehandelaar Isaac Perel.
Hulle vorm ’n unieke straatbeeld, esteties en argitektonies, en verteenwoordig ’n ware ou-Stellenbosse atmosfeer.
No. 1 Minseriestraat is op ’n veiling verkoop en die eienaar wil die huis teen Vrydag sloop en vervang met ’n nuwe woonhuis met ’n keldervloer vir 5 motors, ’n hyser en ’n dubbelverdieping bogronds. Hiervoor het hy die goedkeuring van die owerhede gekry. Die Stellenbosch Belangegroep het dit konsekwent teengestaan, die Stellenbosch Erfenisstigting het dit eers goedgekeur en later herbesin, die Wes-Kaap Erfeniskomitee en die Appèlkomitee het dit afgekeur en die Tribunaal, aangestel deur die minister van kultuursake, het dit finaal goedgekeur.
Die ontwerp van die nuwe huis word as van so ’n hoë kontemporêre styl beskryf dat dit skynbaar die skaal geswaai het ten gunste van sloping, wat kwansuis “esteties meer aanvaarbaar sal wees en meer karakter aan die omgewing sal bring. Die eienaar sou graag die ou huis wou behou en veranderinge en aanbouings daaraan wou doen, maar die gebou het ongelukkig met die jare so verouder en verswak” dat dit nie moontlik is nie – aanhalings uit die suksesvolle aansoek om sloping.
Ons stem nie saam nie. Ons is nie teen nuwe ontwikkeling in die historiese kern nie, maar hier word die menslike skaal versteur en die eenheid van die drie (stewig geboude) huise verbreek.
Op ’n noodvergadering op 21 Januarie is by die eienaar gepleit om die voorbeeld van die huis langsaan te volg waar uitbreidings gedoen is sonder dat die menslike skaal of straatbeeld verdwyn het.
Ons versoek dat die eienaar herbesin. Menige Stellenbosser sal hom geslagte lank dankbaar bly.