- Artikelopsies
- Deel
- Kry Die Burger op
Hollywood kom Durbanville toe
deur Reinhold Swart
2012-02-03 00:00
Ek staan voor Saagsels en Skaafsels in Oxfordstraat, Durbanville. ’n Vrou gil angsbevange, ’n motor toet verwoed, en ’n skoot klap. Ons is deel van die jongste misdaadstatistieke, en Die Burger berig: “Twee vas ná wilde skietdrama” (01.02).
Mense skarrel, maar geen teken van ’n greintjie vrees op hul gesig nie. Meer soos ’n bok-in-die-hok-spelery – koes-koes, wie kry volgende die tennisbal tussen die blaaie.
’n Jongman in ’n grasgroen T-hemp kom voluit om die hoek gehardloop, en ek wonder as dit ’n rower is, wat my nou te doen staan. Die vonkel in sy oë en breë glimlag op sy mond sê optrede is onnodig.
Hy skuil saam met die ander agter die Soet Bistro se muur, maar spoedig glip hy in Wellingtonstraat af. Tellings later kom hy weer om die hoek gehardloop; die rowers het nou voor Ackermans toegeslaan.
Hy is uitasem, maar tevrede soos die ander om deel van hierdie Hollywood-opwinding te wees.
Die polisie is daar en masse, en ek voel dit is nou veilig om oor die kruising na Absa te stap. Ook daar bondel mense saam, en elk probeer die ander met sy weergawe van die gebeure oortuig.
Asof niks gebeur het nie, vleg die bankbesoekers deur die polisie se heldergeel afsperbande om groot bedrae maandeinde-kontant te kom deponeer, en in die bank word die note deur die tellers in ander se wagtende hande afgetel.
Die oom voor my in die ry sorg vir die gebruiklike galgehumor. Sy grappie eindig met: “Ou seun, gaan haal gou Pa se haelgeweer en balaklawa, en sê sommer vir jou ma ek is gou bank toe om geld te trek.”
Almal is darem dankbaar daar was geen ongevalle nie.
Reinhold Swart
Stellenryk