- Artikelopsies
- Deel
- Kry Die Burger op
Hengelaars sluk nie dié regverdigings
deur Hengelaar
2012-02-02 00:00
Marius Pheiffer (die hengelaar wat die zambezihaai doodgemaak het), jy is, soos ons almal, slegs ’n gas in die groter Breëriviermond-ekosisteem en behoort respek te toon vir al die spesies wat daar voorkom.
Niemand het jou aangestel as veiligheidswag of polisieman daar nie.
Jou onkunde oor die gevolge van die verwydering van die top-roofdiere uit die ekosisteem is skreiend en ’n verleentheid vir alle sporthengelaars. Die roofdiere hou sodanige sisteem gebalanseerd.
Ingeligte hengelaars probeer vandag sover moontlik hul vangste veilig terugsit.
Die Engelse gesegde limit your catch, don’t catch your limit word wyd aanvaar, aangesien dit baie duidelik is dat die bron nie die druk van die 200+ bote op die rivier veel langer kan verduur nie.
Sekere spesies se getalle het reeds ineengestort.
Dit is jy en jou trawante wat kwotas en yskaste wil volmaak wat druk op die ekosisteem plaas en die stelsel ongebalanseerd (en derhalwe ongesond) maak, nie die haaie wat bloot hul rol in die natuur vervul nie.
Wat jy interessant genoeg nie aan die lesers uitlig nie, is dat jy die haai se kop afgesny het om dit as ’n trofee te gebruik.
Die geveinsde regverdigings vir hierdie optrede word hoegenaamd nie deur die hengelgemeenskap aanvaar nie, en jy moet jou asseblief nie weer as een van ons bestempel nie.
Hengelaar
Kaapstad