- Artikelopsies
- Deel
- Kry Die Burger op
Dan kan Boland mos Viernasies speel
deur J. Scholtz
2012-02-01 03:57
Dit is moeilik om te peil wat die SA Rugbyunie beoog met die aankondiging dat die Southern Kings van aanstaande jaar gaan Superrugby speel, of wat die dryfveer daaragter is.
As dit transformasie of die bevordering van swart rugbybelange is, tas ons rugbybase mis. Die Southern Kings het wel hul ontstaan te danke aan ’n poging om sogenaamde swart rugby ’n hupstoot te gee, en daar is aangevoer dat die vergete swart spelers van die Oos-Kaap in hierdie span tot hul reg sal kom. In werklikheid het dit toe in ’n span vir tweederangse wit spelers ontaard.
Die Kings se president, Cheeky Watson, en sy afrigter, Alan Solomons, het boonop buitelanders soos Ross Kennedy en Clint Newland gekontrakteer ten koste van plaaslike swart talent.
Die Southern Kings kon verlede seisoen weer nie die Vodacombeker-kompetisie of die B-afdeling van die Curriebeker-reeks wen nie. Die Boland (met tien swart spelers in die groep van 22) het hulle in die eindstryd met 43-12 afgeransel. Daardie dag was net vier swart spelers in die Kings se beginspan en een op die reserwebank.
Vroeër het ’n Baaise klubspan, Parks, die Kings op die nasionale klubkampioenskapsbyeenkoms verteenwoordig sonder dat daar ’n enkele swart speler in die groep was.
Iewers is ’n groot fout, want die streek word as die bakermat van swart rugby voorgehou.
Soos iemand Vrydag met die aankondiging getwiet het: As die Kings Superrugby kan speel, kan die Boland tot die Viernasiesreeks toegelaat te word.
J. Scholtz
Kuilsrivier