- Artikelopsies
- Deel
- Kry Die Burger op
Booysen Park gedra deur steun, erkenning
deur E. Bosman (prinsipaal) en personeel
2012-01-30 18:52
Dikwels word gesê prestering is makliker wanneer verwag word dat jy nie goed sal presteer nie.
Sonder twyfel sal ons baie hard moet werk om ons sukses van verlede jaar te herhaal, maar danksy al die steun wat ons ná die prestasie van ons 2011-matrikulante ontvang het, is ons vol vertroue. Ons is oorval met gelukwensings en goeie wense uit verskillende oorde, hetsy per SMS, telefoonoproepe of persoonlike besoeke deur bekendes én vreemdelinge.
Ons het voorts blootstelling geniet in die druk- en visuele media, plaaslik en nasionaal. Ons is besonder dankbaar vir ons plaaslike nuusblaaie vir die prominensie wat ons geniet het. Hulle was ons staatmaker-bondgenote.
Ons skoolgemeenskap is oorstroom met trots. Ons is seker dat ’n beduidende aantal mense in ons gemeenskap aan ons hul onbaatsugtige ondersteuning sal gee.
Ons betrek ons leerders aktief by die opvoedkundige proses, sodat hulle in die ware sin van die woord verantwoordelikheid vir hul eie leer sal aanvaar. Verlede jaar se matrikulante was uitmuntend in hierdie verband, en ons wens hulle almal die beste toe.
As personeel wil ons dus ons innige dank uitspraak teenoor almal wat aan ons sukses erkenning gegee het. Ons sal probeer om weer dieselfde prestasievlak in alle grade te behaal.
E. Bosman (prinsipaal) en personeel
Hoërskool Booysen Park