- Artikelopsies
- Deel
- Kry Die Burger op
Beheptheid met dié vakke moet end kry
deur Carel Greyling
2012-02-01 03:57
Ek verwys na Ben du Plessis se brief “Kunstenaars kan nie infrastruktuur skep” (DB, 30.01). Ek dink hy slaan die bal heeltemal mis oor die ware doel van my brief (DB, 28.01), wat hoofsaaklik gaan oor die dilemma van leerders wat nie wiskunde op ’n senior sekondêre vlak kan doen nie, maar gedwing word.
Du Plessis se beklemtoning van die land se infrastruktuur laat my wonder wat hy dink van al die geleerdes in die geesteswetenskappe (ook van groot belang in die ontwikkeling van denke oor die algemeen) en of hulle dan liefs hul taak moet neerlê ter wille van die wetenskap.
Ek stel voor leerders met ’n sterk aanleg in wiskunde en rekeningkunde word geïdentifiseer en die regering stel hulle almal met beurse in staat om die dringende behoefte in die wetenskappe te vul. Akademiese kwalifikasies in rekeningkunde sal ook help om die verskillende owerhede se boeke te laat klop.
“Onwiskundig” se brief (30.01) wys wat kan voortvloei uit die regte persoon op die regte plek met die regte vakkeuse. In die onderwys gaan dit eerstens om elke leerder maksimaal te laat voordeel trek uit die onderwys, wat sekerlik deur ons land se Grondwet gewaarborg word. Leerders moet hul volle potensiaal kan verwesenlik en die land dien met talente in elke samelewingsektor.
Ek dink dit is hoog tyd dat die fanatiese beheptheid met wiskunde en wetenskap (ek betwyfel nie die belang daarvan vir vooruitgang nie) ten koste van al die ander end kry.
Carel Greyling
Kuilsrivier