’n Geskenk vir alle kinders
2010-04-20 21:57
- Artikelopsies
- Deel
- Kry Die Burger op
Met ’n doodgewone, maar dapper Suid-Afrikaanse dogtertjie, Phapo, en ’n eg Suid-Afrikaanse storie wil die maatskaplike werker en skrywer Marita van Aswegen
vir kinders wys hulle is belangrik, skryf Riëtte Grobler.
Om met kinders oor die blommetjies en bytjies te gesels is moeilik. Om boonop kwessies soos maagdelikheid, vigs en die dood by so ’n gesprek in te klits, klink dalk na ’n onmoontlike opdrag.
Dit is egter presies wat die skrywer en maatskaplike werker Marita van Aswegen op ’n sensitiewe en kindervriendelike manier doen in haar boek, Phapo se geskenk.
Phapo is ’n tienjarige meisietjie op die platteland. Haar pa, met wie sy ’n hegte band het, is sterwend weens vigs.
Boonop flikflooi die seuns al hoe meer met haar langs die grondpad waarlangs sy 5?km skool toe moet stap en verdwyn een van haar ouer maatjies dikwels agter die bome saam met ’n kêrel.
Hoewel Phapo gekonfronteer word met dié dinge, bly sy ’n kind. Een wat droom van ’n pop met baie rokke en van ’n blink toekoms.
Nadat haar ouma met haar oor haar kosbare vrug, maagdelikheid, gesels het, is sy vasbeslote om niemand toe te laat om haar daarvan te ontneem nie.
Die towerkrag van kindwees
“Ek besef die boek kan dalk omstrede klink, maar dit is nie die doel nie. Kinders lê my na aan die hart en my belangrikste doel met die boek is om aan alle kinders dié boodskap te stuur: Jý is ook belangrik,” verduidelik Van Aswegen.
“Dit sal so hartseer wees as die magic uit kindwees verdwyn,” sê sy, maar voeg by jy moet kinders inlig om hulle te help om dié towerkrag te behou. Oor kritiek dat haar boek prekerig mag voorkom, trek Van Aswegen net haar skouers op.
“Ek wil ook nie hê mense moet vir my preek nie, maar ek wil graag ingelig word,” sê sy. “Met die boek wou ek vir kinders wys hul maagdelikheid is nét hulle s’n.
“Ek dink dit is belangrik om met kinders oor moeilike onderwerpe te gesels.
“Ons, ouers, wil ons kinders teen die harde werklikheid beskerm, maar die werklikheid is dat kinders tog daaraan blootgestel word,” vertel Van Aswegen, wat as maatskaplike werker dikwels met kinders te doen kry wat seksueel mishandel is.
“Die boodskap wat ons met hulle behoort te deel is: Al het jy jou ouers verloor, al is jy mishandel en al het jy níks, bly daardie iemand wat jy ís, belangrik,” beduie sy passievol.
Die dinge wat kinders sien
As boervrou woon sy al 36 jaar lank saam met haar man op hul Vrystaatse plaas en sien sy daagliks hoe kinders, nes Phapo, etlike kilometers skool toe moet stap. Ander het een of albei ouers verloor en word deur familielede versorg of deel ’n klein woonruimte met baie ander mense.
Gevolglik sien en hoor hulle dinge waaraan hulle nie blootgestel behoort te word nie.
“Hoewel sulke kinders op die oog af meer seks-wise mag voorkom, verstaan hulle as kinders nie werklik begryp waaroor seks gaan nie,” sê Van Aswegen.
“Dan is die enigste plek waar
iemand onderwerpe soos seks en vigs op hul vlak met hulle bespreek, ’n boek soos hierdie een, waaraan hulle dalk by die skool blootgestel word,” verduidelik sy.
Selfs kinders wat in beskermende, liefdevolle huishoudings grootword en nie noodwendig Phapo se leefwêreld deel nie, sal kan baat vind by die boek, meen Van Aswegen.
Oor die boekPhapo se geskenk leer kinders oor die impak van vigs en die voordele van seksuele onthouding.
Die illustreerder Fanie Viljoen se prentjies verhelder die bladsye en die eenvoudige verhaallyn maak daarvan ’n lekkerlees-boek.
Die boek word uitgegee deur Knowledge Thirst Media en kos R95. Die ISBN is 9780?6204?57255.