Twiets vlieg ver voor res se nuus

Terwyl kenners wag om te sien of Twitter ’n groot mylpaal gaan haal, het dié sosiale netwerk hierdie week weer daarin geslaag om eerste met die nuus te wees.

Kenners voorspel Twitter gaan teen die einde van vandeesmaand die 500 miljoen-mylpaal haal.

Daar is nou ongeveer 465 miljoen gebruikers. Dit beteken dié diens voeg elke sekonde 11 nuwe gebruikers by sy getalle.

Hoewel Twitter nie naastenby met dieselfde getal gebruikers as Facebook spog nie, is Twitter se relevansie as sosiale netwerk onlangs weer met die dood van Whitney Houston bewys.

’n Twiet van @ajadiornavy oor die sangeres se dood is uitgestuur 40 minute voordat die hoofstroommedia aanlyn daaroor kon berig.

Hoewel dit sekerlik nie altyd ’n akkurate nuusbron is nie, is dit doeltreffend. ’n Twiet oor so ’n gebeurtenis word deur die volgelinge van ’n sekere rekening weer getwiet en kan binne sekondes wêreldwyd versprei.

So was Twitter ook ’n toonaangewende rolspeler in laas jaar se protesoptrede deur jong mense in Egipte. Dit het daartoe gelei dat dié land se leier, oudpres. Hosni Moebarak, ná 30 jaar in beheer bedank het.

Maar in die vinnig veranderende wêreld van tegnologie is niks ooit seker nie. Die netwerk wat vandag die toonaangewende een is, is dalk môre uitgedien. En nuwe mededingers klop voortdurend aan die deur.

“Twitter is soveel meer as net ’n sosiale netwerk,” het sy mede-stigter, Jack Dorsey, onlangs gesê in reaksie op die internet-reus Google se Google+, wat as mededinger vir Twitter en Facebook beskou word.

“Ons hou onsself besig om Twitter uit te brei en het nie tyd om bekommerd te wees oor nuwelinge nie,” het Dorsey gesê.

“Die ‘sosiale’ deel is net een kant van wat ons doen. Ons sien Twitter meer as ’n inligtingsdiensverskaffer.”

Hy het dié netwerk as ’n persoonlike nuusdiens beskryf.

“Jy hoef glad nie self twiets uit te stuur nie, maar jy kan volg wat in die wêreld aangaan op die oomblik dat dit gebeur.”

Met Twitter se miljoene gebruikers is dit te verstane dat beleggers angstig dat dié maatskappy op die aandelebeurs genoteer word.

Tog is daar diegene wat sê Twitter het nog nie bewys hy kan geld maak nie.

Maar volgens Dorsey is adverteerders gretig om hul twiets en rekeninge te bemark.

“Ons werk al ’n geruime tyd aan ons sakeplan en dit wérk,” het hy gesê.

Twitter het laas jaar na raming $140 miljoen (sowat R1,1 miljard) verdien.