Resep van die week
2012-02-01 06:00
- Artikelopsies
- Deel
- Kry Die Burger op
Maak lekker ’n pastadis met kaas, aspersies
Genoeg vir 6
Jy benodig:
250 g mafaldine- of farfalle (skoenlapper)-pasta
2 x 410 g-blikke aspersiestukke, hou die inlê-water
190 g botter
80 ml meel
500 ml melk
sout en swartpeper
’n knypie neutmuskaat
500 g gerasperde cheddar
250 g gerasperde parmesaan
Vir die tamatiesous:
60 ml olyfolie
1 ui, gekap
5 ml knoffel, fyn gekap
750 ml tamatie-passata
sout en swartpeper
15 ml suiker
30 g vars basilie, fyn gekap
Maak só:
- Kook die pasta in kokende soutwater tot net sag.
- Terwyl die pasta kook, dreineer die aspersies en behou 500 ml van die inlê-water. Meng dié water met die melk.
- Smelt die botter in ’n mediumgrootte kastrol en roer die meel by. Kook vir ’n minuut en klits dan geleidelik die melk-en-aspersiewater-mengsel by.
- Geur met sout, peper en neutmuskaat. Hou eenkant en wanneer dit effens afgekoel het, roer die aspersiestukke en die gaar pasta by.
- Verhit die oond tot 180 °C en bespuit ’n groot, oondvaste bak met kleefwerende kossproei.
Maak die tamatiesous terwyl die oond warm word: Verhit die olyfolie in ’n groot kastrol en soteer die uie en die knoffel tot sag. Voeg die passata by en laat prut onbedek totdat dit effens verdik. Geur na smaak en voeg die suiker by. Roer die basilie by.
- Stel die gereg saam: Versprei die tamatiesous in die bak. Giet die pastamengsel oor en sprinkel dan die kase oor. Bak 30 min. tot 40 min. tot goudbruin en borrelend.
– Uit Effortless Entertaining deur Sharon Glass. ISBN 9780620505727. Die boek word deur ATV CC uitgegee.