Kry ’n winskopie vir die wynglas
2012-01-25 06:00
- Artikelopsies
- Deel
- Kry Die Burger op
Net soos Amazon die manier waarop boeke verkoop word radikaal verander het, is daar nou ’n groep webwerf-entrepreneurs wat probeer om dieselfde revolusie in die wynmark te vestig.
In Amerika is daar meer as ’n halfdosyn webwerwe waarop wyn teen tot 60% afslag geadverteer word. Daar is soortgelyke webwerwe met ’n tuisbasis in Brittanje en Australië en daar is selfs een of twee in Frankryk.
Hierdie entrepreneurs gebruik die sosiale media om wynliefhebbers bewus te maak van dié winskopies.
Maar is dit werklik goeie aanbiedinge?
“Ek dink dis soms dalk ’n goeie kopie vir die nie-ernstige wyndrinker,” sê Bill Marsano, voormalige wynredakteur by die tydskrif Hemispheres.
“Die ernstige wynversamelaar, wat baie kennis het van wyne, sal moontlik teleurgesteld wees.”
Slurp.co.uk is ’n aanlyn-wynhandelaar wat uit Londen bedryf word. Volgens dr. Jeremy Howard, uitvoerende hoof, werk dit op dieselfde basis as Amazon.
En net soos die Amerikaanse webwerwe hou Slurp sogenaamde kitsuitverkopings waarin wyn teen groot afslagpryse vir ’n baie kort tydperk beskikbaar is – soms so kort as 30 minute.
Daar is ook ’n susterwebwerf in Hongkong.
Albei dié webwerwe adverteer hul kitsuitverkopings op Twitter en Facebook, maar nie per e-pos nie.
Wynhandelaars in Amerika gebruik ook Facebook en Twitter om kliënte te werf. Hulle sal ook e-posse inspan. Wat hulle anders doen, is om langer uitverkopings te hou en geen of min versendingskoste te vra. Hulle sal ook die wyn stoor.
In Europa lyk die prentjie ’n bietjie anders.
Die Franse sakeskool BEM het in ’n studie gevind daar is ’n paar webwerwe in Frankryk, Spanje en Duitsland wat wyn aanlyn verkoop, maar slegs ’n paar span die sosiale media in om verkope te bevorder. Die meeste het geen Facebook-blad nie en slegs ’n paar is op Twitter.
Volgens BEM is R32 miljard se wyn verlede jaar aanlyn verkoop en dié syfer kan vanjaar tot R50 miljard styg.
Dié verkope is gedryf deur webwerwe soos Wine.com, WTSO.com, Invino.com en Vitius.com, wat op Twitter, Facebook en e-pos staatmaak om hul produkte te bemark.
“Ons kliënte is sekerlik nie die gesofistikeerde soort nie, maar ons maak wyn toeganklik vir almal,” sê Elliot Arking, wat saam met sy broer Joseph en seun Jamie WTSO.com bedryf.
“Wine Til Sold Out” se daaglikse aanbiedinge geld – een soort wyn op ’n slag – totdat die laaste bottel verkoop is.
Invino.com se uitverkopings hou gewoonlik ’n paar dae, terwyl Vitius.com ’n gemiddelde van drie uitverkopings per dag het. – Reuters