In voeling met Madiba
2012-02-01 06:00
Oudpres. Nelson Mandela se 46664 Apparel-modereeks is verlede jaar in Augustus in Suid-Afrika bekend gestel.
Die opbrengste word aan liefdadigheidsorganisasies geskenk wat gemoeid is met die uitbou van Mandela se “humanitêre nalatenskap.”
Die reeks bou voort op ’n verbintenis met ’n “organisasie met integriteit” soos die Nelson Mandela-stigting en die nommer 46664 (Mandela se tronknommer).
“Mense gaan nie net goed lyk in die uitrustings nie, maar ook goed voel om te weet hulle is deel van ’n globale beweging,” het me. Samantha Manclark, wat medianavrae namens die reeks hanteer het, gesê.
Die teikenmark van 46664 Apparel is mans en vroue van alle ouderdomme en binnekort ook kinders.
Seardel, ’n tekstiel-en-klerevervaardiger, en Suid-Afrikaanse modeontwerpers van ID Brand in Kaapstad werk heeltyds daaraan.